കണ്ണൂര്‍: കൃത്യനിര്‍വഹണത്തിനിടെ പൊലിസുകാരനെ മര്‍ദിച്ച യുവാവ് അറസ്റ്റില്‍. സിറ്റി പൊലിസ് സ്‌റ്റേഷനിലെ കോണ്‍സ്റ്റബിള്‍ മുനീറിനാണ് മര്‍ദനമേറ്റത്. സംഭവത്തില്‍ കസാനക്കോട്ട സ്വദേശി ഷബീറിനെ (35) പൊലിസ് അറസ്റ്റ് ചെയ്തു. ഇന്നലെ വൈകുന്നേരം ആറരയോടെ ജില്ലാ ആശുപത്രിക്കു മുന്‍പിലായിരുന്നു സംഭവം. ആശുപത്രിക്കു സമീപം വഴിവാണിഭം നടത്തുകയായിരുന്ന ഗഫൂര്‍ എന്നയാളെ ഷബീര്‍ മര്‍ദിച്ചതായി പറയുന്നു. ഗഫൂര്‍ ആശുപത്രിയില്‍ ഡ്യൂട്ടിയിലായിരുന്ന മുനീറിനോട് പരാതി പറഞ്ഞതിനെ തുടര്‍ന്ന് അന്വേഷിക്കാനെത്തിയപ്പോള്‍ ഷബീര്‍ പൊലിസുകാരനെ മര്‍ദിക്കുകയായിരുന്നു. മുഖത്ത് പരിക്കേറ്റ മുനീര്‍ സ്റ്റേഷനില്‍ വിവരം അറിയിക്കുകയും ഉടന്‍ പൊലിസെത്തി പ്രതിയെ അറസ്റ്റ് ചെയ്യുകയുമായിരുന്നു.