ആലക്കോട്: പൊതുസ്ഥലത്തെ മരം മുറിച്ചു നീക്കുവാനുള്ള സ്വകാര്യ വ്യക്തിയുടെ ശ്രമം നാട്ടുകാര്‍ തടഞ്ഞു. ആലക്കോട് കോളി റോഡിലാണ് നൂറുകണക്കിന് കുടുംബങ്ങള്‍ കുടിവെള്ളത്തിനായി ഉപയോഗിക്കുന്ന പൊതു കിണറിന് സമീപത്തെ തണല്‍ മരം മുറിച്ചു കടത്താന്‍ ശ്രമിച്ചത്. ഞായറാഴ്ച രാവിലെയോടെയാണ് സംഭവം. വിവരമറിഞ്ഞെത്തിയ പരിസ്ഥിതിപ്രവര്‍ത്തകരും നാട്ടുകാരും ചേര്‍ന്ന് തടയുകയായിരുന്നു. മരത്തിന്റെ ഇലകള്‍ തന്റെ വീട്ടുമുറ്റത്ത് വീഴുന്നതിനാലാണ് മരം മുറിക്കാന്‍ തീരുമാനിച്ചതെന്നാണ് സ്വകാര്യ വ്യക്തിയുടെ വാദം. പഞ്ചായത്ത് മെമ്പറുടെ മൗനാനുവാദത്തോടെയാണ് ഇയാള്‍ മരം മുറിക്കാന്‍ ശ്രമം നടത്തിയതെന്നും ആക്ഷേപമുണ്ട് . എന്നാല്‍ പഞ്ചായത്തില്‍ നിന്ന് മരം മുറിക്കുവാനുള്ള അനുമതി ആര്‍ക്കും നല്‍കിയിട്ടില്ലെന്ന് പഞ്ചായത്ത് അധികൃതര്‍ അറിയിച്ചു. അനധികൃതമായി മരം മുറിച്ചു കടത്താന്‍ ശ്രമിച്ച സ്വകാര്യ വ്യക്തിക്കെതിരെ നിയമ നടപടികള്‍ സ്വീകരിക്കുമെന്ന് പഞ്ചായത്ത് വൈസ് പ്രസിഡന്റ് സി മോഹനും പറഞ്ഞു. നാടാകെ മരം നട്ട് പിടിപ്പിക്കുമ്പോള്‍ പൊതുസ്ഥലത്തെ മരം മുറിച്ചു നീക്കാന്‍ ശ്രമിച്ച സംഭവത്തില്‍ പ്രദേശത്ത് വ്യാപക പ്രതിഷേധമുയര്‍ന്നിട്ടുണ്ട്.