തിരുവനന്തപുരം: സംസ്ഥാന സര്‍ക്കാരിന്റെ സമ്പൂര്‍ണ ഭവനപദ്ധതിയായ ലൈഫ് മിഷന്‍ വഴി പൂര്‍ത്തിയാക്കുന്ന വീടുകളുടെ എണ്ണം ഡിസംബറോടെ രണ്ട് ലക്ഷമാക്കും.
ഒന്നും രണ്ടും ഘട്ടങ്ങളിലായി ഇതുവരെ 1,03,644 വീടുകളുടെ നിര്‍മാണം പൂര്‍ത്തിയായി. ഇതോടെ ദേശീയതലത്തില്‍ തന്നെ ഏറ്റവും കുറഞ്ഞ സമയത്തില്‍ ഇത്രയും അധികം വീടുകള്‍ പൂര്‍ത്തിയാക്കിയ സംസ്ഥാനമായി കേരളം മാറി. പൂര്‍ത്തീകരിക്കാത്ത ഭവനങ്ങളുടെ നിര്‍മാണമാണ് ലൈഫ് മിഷന്‍ ഒന്നാംഘട്ടത്തില്‍ ലക്ഷ്യമിട്ടിരുന്നത്. ഒന്നാംഘട്ടത്തില്‍ പൂര്‍ത്തീകരിക്കേണ്ടിയിരുന്ന 54,351 വീടുകളില്‍ 51,509 വീടുകള്‍ (94.77 ശതമാനം) നിര്‍മിച്ചുകഴിഞ്ഞു. 633.67 കോടി രൂപ ഗുണഭോക്താക്കള്‍ക്ക് ഭവനിര്‍മാണത്തിന് ധനസഹായമായി നല്‍കി.
രണ്ടാംഘട്ടത്തില്‍ 30,359 (34.58 ശതമാനം) ഗുണഭോക്താക്കള്‍ ഭവന നിര്‍മാണം പൂര്‍ത്തീകരിച്ചു. പി.എം.എ.വൈ ലൈഫ് അര്‍ബന്‍ പ്രകാരം 21,776 (30.08 ശതമാനം) വീടുകളുടെ നിര്‍മാണവും ഇതിനോടകം പൂര്‍ത്തിയായിട്ടുണ്ട്. ബാക്കിയുള്ള വീടുകളുടെ നിര്‍മാണം വിവിധ ഘട്ടങ്ങളിലാണ്. മൂന്നാംഘട്ടത്തിന്റെ ഭാഗമായി അടിമാലിയില്‍ ഭവന സമുച്ചയം പൂര്‍ത്തീകരിച്ച് അടിമാലി ഗ്രാമപഞ്ചായത്തിലെ അര്‍ഹരായ 163 ഗുണഭോക്താക്കള്‍ക്ക് കൈമാറിക്കഴിഞ്ഞു.
ലൈഫ് രണ്ടാംഘട്ടത്തില്‍ ഭൂമിയുള്ള ഭവനരഹിതരുടെ ഭവന നിര്‍മാണവും മൂന്നാംഘട്ടത്തില്‍ ഭൂരഹിത ഭവനരഹിതരുടെ പുനരധിവാസവുമാണ് ലക്ഷ്യം. രണ്ടാംഘട്ടം പൂര്‍ത്തീകരിക്കുന്നതിനായി പല പ്രമുഖ ബ്രാന്‍ഡുകളുമായി കൈകോര്‍ത്തുകൊണ്ട് കുറഞ്ഞ നിരക്കില്‍ വീട് നിര്‍മാണ സാമഗ്രികള്‍ വിതരണം ചെയ്യുന്നതിനുള്ള നടപടികള്‍ ലൈഫ്മിഷന്‍ കൈക്കൊണ്ടിട്ടുണ്ട്.