ന്യൂഡല്‍ഹി: ഡല്‍ഹിയിലെ കേരളാ ഹൗസില്‍ സംഘപരിവാര്‍ പ്രവര്‍ത്തകരുടെ അക്രമം. ഇന്നലെ രാത്രി 8.30ഓടെ ഗോസംരക്ഷണ ക്രാന്തിസേനയുടെ പേരില്‍ പത്തില്‍ താഴെ വരുന്ന പ്രവര്‍ത്തകരാണ് കേരളാ ഹൗസില്‍ അതിക്രമിച്ചു കയറി സംഘര്‍ഷമുണ്ടാക്കിയത്. പത്തുമിനിറ്റോളം കേരളാ ഹൗസ് കോംപൗണ്ടിനു മുന്നില്‍ മുദ്രാവാക്യം വിളിച്ച സംഘം പിന്നീട് ഗേറ്റ് തള്ളിത്തുറന്ന് അകത്തുകടന്നു.
കന്നുകാലി വില്‍പ്പനയുമായി ബന്ധപ്പെട്ട വിഷയത്തില്‍ കേരളാസര്‍ക്കാരിനും മുഖ്യമന്ത്രി പിണറായി വിജയനും എതിരേ മുദ്രാവാക്യം വിളിച്ചായിരുന്നു അക്രമം. ഈ സമയം പൊലിസ് സ്ഥലത്തുണ്ടായിരുന്നെങ്കിലും അവര്‍ ഇടപെട്ടില്ല. കഴിഞ്ഞവര്‍ഷം കേരളാ ഹൗസിലെ കാന്റീനില്‍ പശുവിറച്ചി വില്‍ക്കുന്നുണ്ടെന്നാരോപിച്ച് സംഘപരിവാര്‍ പ്രവര്‍ത്തകര്‍ അക്രമം നടത്തിയിരുന്നു.