പയ്യോളി: ദേശീയ പാതയില്‍ പെരുമാള്‍പുരത്ത് നിയന്ത്രണംവിട്ട കാറിടിച്ച് റോഡരികില്‍ നില്‍ക്കുകയായിരുന്ന യുവാവ് മരിച്ചു. ഒപ്പമുണ്ടായിരുന്ന ബന്ധുവിന് ഗുരുതരമായി പരുക്കേറ്റു. പെരുമാള്‍പുരം തിക്കോടി തെരുവിലെ തണ്ടോറ വടക്കയില്‍ രാജേഷ് (30) ആണ് മരിച്ചത്. ഗുരുതരമായി പരുക്കേറ്റ തണ്ടോറ വടക്കയില്‍ സുജിത്തിനെ കോഴിക്കോട് മെഡിക്കല്‍ കോളജ് ആശുപത്രയില്‍ പ്രവേശിപ്പിച്ചു. ഇന്നലെ രാവിലെ 11.45 നാണ് അപകടം. വടകര ഭാഗത്ത് നിന്ന് വരികയായിരുന്ന കാര്‍ നിയന്ത്രണം വിട്ട് റോഡരികില്‍ സംസാരിച്ച് നില്‍ക്കുകയായിരുന്ന രാജേഷിനേയും ബന്ധുവായ സുജിത്തിനേയും ഇടിച്ച് വീഴ്ത്തുകയായിരുന്നു.
പെരുമാള്‍പുരം ബസ് സ്‌റ്റോപ്പിന് മുന്നിലെ റോഡിലെ വലിയ കുഴി ഒഴിവാക്കാനായി എതിര്‍ ദിശയില്‍ വന്ന മറ്റൊരു കാര്‍ വെട്ടിച്ചപ്പോള്‍ കൂട്ടിയിടി ഒഴിവാക്കാന്‍ ശ്രമിക്കുന്നതിനിടെയാണ് വടകര ഭാഗത്ത് നിന്ന് വരികയായിരുന്ന കാര്‍ നിയന്ത്രണം വിട്ട് രാജേഷിനെയും ബന്ധു സുജിത്തിനേയും ഇടിച്ച് വീഴ്ത്തിയത്.
വിവാഹം ഉറപ്പിക്കുന്നതുമായി ബന്ധപ്പെട്ട ചടങ്ങ് വീട്ടില്‍ വച്ച് ഇന്നലെ നടത്താനിരിക്കെയാണ് രാജേഷിനെ മരണം തട്ടിയെടുത്തത് .
രാജേഷിന്റെ പിതാവ്: ശിവദാസന്‍. മാതാവ്: ലീല. സഹോദരന്‍: ഹരീഷ് .സംസ്‌കാരം ഇന്ന് രാവിലെ വീട്ടുവളപ്പില്‍.