ചെന്നൈ: കന്നുകാലി അറവ് നിയന്ത്രണത്തിനെതിരേ തമിഴ്‌നാട്ടില്‍ ഡി.എം.കെയുടെ നേതൃത്വത്തില്‍ ശക്തമായ പ്രക്ഷോഭം തുടങ്ങി. പ്രധാനമന്ത്രി പറയുന്നതുമാത്രമേ രാജ്യത്തെ ജനങ്ങള്‍ കഴിക്കാവൂ എന്ന നയം ശരിയല്ലെന്ന് ഡി.എം.കെ വ്യക്തമാക്കി. ജല്ലിക്കെട്ട് സമരത്തെ അനുസ്മരിച്ച് മറ്റൊരു മറീന വിപ്ലവത്തിന് സംസ്ഥാനം മാത്രമല്ല രാജ്യം തന്നെ സാക്ഷ്യം വഹിക്കേണ്ടി വരുമെന്ന് സ്റ്റാലിന്‍ കേന്ദ്ര സര്‍ക്കാരിന് മുന്നറിയിപ്പു നല്‍കി.
മൂന്ന് വര്‍ഷത്തെ ഭരണത്തില്‍ നേട്ടമുണ്ടാക്കിയെന്ന കേന്ദ്രസര്‍ക്കാരിന്റെ പ്രഖ്യാപനം ശരിയല്ല. സംസ്ഥാനത്ത് കേന്ദ്രത്തിന്റെ വികസന പദ്ധതികള്‍ കുറഞ്ഞിട്ടുപോലും പളനിസാമി സര്‍ക്കാര്‍ പ്രതികരിക്കാത്തത് എന്തുകൊണ്ടാണെന്നും സ്റ്റാലിന്‍ ചോദിച്ചു. 2014ലെ ലോക്‌സഭാ തെരഞ്ഞെടുപ്പില്‍ സംസ്ഥാനത്തിനായി നിരവധി വാഗ്ദാനങ്ങളാണ് നല്‍കിയിരുന്നത്. എന്നാല്‍ ഇതൊന്നും ഇതുവരെ നടപ്പാക്കാന്‍ കേന്ദ്ര സര്‍ക്കാരിനായിട്ടില്ലെന്ന് അദ്ദേഹം ആരോപിച്ചു.