മോസ്‌കോ: സാങ്കേതിക തകരാറിനെ തുടര്‍ന്ന് റഷ്യയുടെ സോയൂസ് റോക്കറ്റ് അടിയന്തരമായി താഴെയിറക്കി. അന്താരാഷ്ട്ര ബഹിരാകാശ നിലയത്തിലേക്ക് രണ്ട് യാത്രക്കാരുമായി പുറപ്പെട്ട റോക്കറ്റ് കസാഖിസ്ഥാനിലാണ് തിരിച്ചിറക്കിയത്. റോക്കറ്റിലുണ്ടായിരുന്ന യു.എസ് സഞ്ചാരി നിക്ക് ഹോഗ്, റഷ്യന്‍ ബഹിരാകാശ യാത്രികനായ അലക്‌സി എന്നിവര്‍ സുരക്ഷിതരാണെന്ന് നാസയും റഷ്യന്‍ ബഹിരാകാശ ഏജന്‍സിയായ റോസ്‌കോസ്‌മോസും അറിയിച്ചു.
റോക്കറ്റിലെ ബൂസ്റ്ററിലാണ് തകരാറുണ്ടായതെന്നും ഇരുവരും പിന്നീട് അറിയിച്ചു. അടിയന്തര ലാന്‍ഡിങ് സംവിധാനം ഉപയോഗിച്ചാണ് ഇരുവരും രക്ഷപ്പെട്ടതെന്നും കസാഖിസ്ഥാനിലെ വടക്കന്‍ ബയ്കാനര്‍ പ്രദേശത്ത് നിന്ന് നൂറുകണക്കിന് മൈലുകള്‍ക്കപ്പുറത്താണ് ഇവര്‍ ഇറങ്ങിയതെന്നും നാസ പറഞ്ഞു.
രണ്ട് യാത്രികരെയും കണ്ടെത്തിയെന്നും അവര്‍ ആരോഗ്യവാന്മാരാണെന്നും നാസ കൂട്ടിച്ചേര്‍ത്തു. വിക്ഷേപണത്തിന്റെ ആദ്യ ഘട്ടത്തില്‍ പ്രശ്‌നങ്ങളൊന്നുമുണ്ടായില്ലെങ്കിലും 90 സെക്കന്റുകള്‍ക്ക് ശേഷമാണ് ബൂസ്റ്ററില്‍ തകരാറുകളുണ്ടായത്. റോക്കറ്റ് ആദ്യഘട്ടത്തില്‍ നിന്ന് രണ്ടാം ഘട്ടത്തിലേക്ക് വേര്‍പ്പെടുന്നതിനിടെയാണ് തകരാറ് ആരംഭിച്ചത്.