തിരുവനന്തപുരം : അധ്യായന വര്‍ഷത്തിലെ ആദ്യ ദിനം തലസ്ഥാന ജില്ലയിലെ സ്‌കൂളുകള്‍ ഉത്സവാന്തരീക്ഷത്തിലായിരുന്നു. ആടിയും പാടിയും പുതുതായെത്തിയ കുരുന്നുകളും ഒന്നാംദിനം ആഘോഷമാക്കി. പതിവ് കണ്ണീര്‍ക്കാഴ്ചകളുമായെത്തിയവരും ഉണ്ടായിരുന്നെങ്കിലും ഏറെപ്പേരും  അത്യുത്സാഹത്തിലായിരുന്നു. ഗൃഹാന്തരീക്ഷത്തില്‍ നിന്നു  അക്ഷരമുറത്തേക്ക് എത്തിയ കൊച്ചു മിടുക്കന്മാരും മിടുക്കികളും, അവിടെയൊരുക്കിയിരുന്ന കൗതുകക്കാഴ്ച്ചകള്‍ കണ്ട് കരയാന്‍ മറന്നു എന്നു വേണം പറയാന്‍. ഒപ്പമെത്തിയ മുതിര്‍ന്നവരുടെ ഫോണില്‍ സെല്‍ഫിയെടുത്ത രസിച്ച വിരുതന്മാരെയും ആദ്യ ദിനത്തില്‍  കണ്ടു.  മധുരപലഹാരങ്ങളും സമ്മാനപ്പൊതികളും നല്‍കിയാണ് മിക്ക സ്‌കൂളുകളും പുത്തന്‍ കൂട്ടുകാരെ വരവേറ്റത്.
പ്രവേശനോത്സവത്തിന്റെ സംസ്ഥാനതല ഉദ്ഘാടനം ഊരൂട്ടമ്പലം സര്‍ക്കാര്‍ യു.പി സ്‌കൂളില്‍ മുഖ്യമന്ത്രി പിണറായി വിജയന്‍ നിര്‍വഹിച്ചു. വിദ്യാഭ്യാസമന്ത്രി സി.രവീന്ദ്രനാഥ് അധ്യക്ഷനായി.
കഥ പറഞ്ഞു കൊണ്ടാണ്  വിദ്യാഭ്യസമന്ത്രി  പ്രവേശനോത്സവത്തിന് തുടക്കമിട്ടത്.  രാവിലെ തന്നെ സ്‌കൂളില്‍ എത്തിയ മന്ത്രിയെ  സ്‌കൂള്‍ അധിക്യതര്‍ സ്‌കൂളിലെ ഒന്നാം ക്ലാസിലേക്ക് ആനയിച്ചു. പുത്തന്‍ ഉടുപ്പും ബലൂണും കളിപ്പാട്ടങ്ങളുമായി കാത്തിരുന്ന കുഞ്ഞുങ്ങള്‍ക്ക് മുന്നില്‍   മന്ത്രി  പ്രകൃതിയുടെ കഥ പറഞ്ഞു. ആനയും മുയലും തുമ്പിയും കുരങ്ങനും പിന്നെ മനുഷ്യനും തമ്മിലുള്ള സംഭാഷണത്തില്‍ തങ്ങള്‍ക്ക് പ്രിയപ്പെട്ടവ ഏതെന്ന് പരസ്പരം പറയുന്നു. കുരങ്ങനും തൂമ്പിയും മുയലും ആനയും പ്രക്യതിയുടെ താളത്തില്‍ ഊന്നി നിന്നപ്പോള്‍ മനുഷ്യന്‍ തന്റെ ആഗ്രഹം പണം ആണെന്നും അത് താന്‍ ജീവിക്കുന്ന സമൂഹത്തെ നശിപ്പിച്ചായാലും നേടുമെന്ന് പറയുന്നു. എന്നാല്‍ എവിടെ പണമെന്ന് ചോദിച്ച് മനുഷ്യനെ കളിയാക്കിയ ജീവികള്‍ക്ക് മുന്നില്‍ പ്രകൃതിയാണ് എല്ലാം എന്ന് സമ്മതിപ്പിക്കുന്ന കഥയാണ് മന്ത്രി കുരുന്നുകള്‍ക്ക് പറഞ്ഞു കൊടുത്തത്.
തിരുവനന്തപുരം നഗരസഭാ തല  പ്രവേശനോത്സവം കോട്ടണ്‍ഹില്‍ ഗവ. എല്‍.പി സ്‌കൂളില്‍ മേയര്‍ വി.കെ.പ്രശാന്ത് ഉദ്ഘാടനം ചെയ്തു. ഡെപ്യൂട്ടി മേയര്‍  രാഖി രവികുമാര്‍ അധ്യക്ഷയായി.
 ജില്ലാതല പ്രവേശനോത്സവം  വര്‍ക്കല  ഗവ എല്‍. പി .ജി .എസില്‍  അഡ്വ വി. ജോയി എം .എല്‍. എ ഉദ്ഘാടനം ചെയ്തു.അല്‍പം അമ്പരപ്പും അതിലേറെ കൗതുകവുമായെത്തിയ പുതിയ അതിഥികളെ മുനിസിപ്പല്‍ ചെയര്‍പേഴ്‌സണ്‍ ബിന്ദു ഹരിദാസ് കിരീടമണിയിച്ചു സ്വീകരിച്ചു. കിരീടത്തിനൊപ്പം കൈ നിറയെ  മധുരവും കഥാപുസ്തകങ്ങളും ലഭിച്ചപ്പോള്‍ അമ്പരപ്പിനെല്ലാം വിട നല്‍കി എം. എല്‍. എക്കൊപ്പം പൂച്ചകരയാനും കാക്ക കരയാനും പൊട്ടിച്ചിരിക്കാനും  കുഞ്ഞുങ്ങള്‍ റെഡി..!
  വര്‍ക്കല ബ്ലോക്ക് പഞ്ചായത്ത് പ്രസിഡന്റ് എം. കെ യൂസുഫ്, മുനിസിപ്പാലിറ്റി വൈസ് ചെയര്‍മാന്‍ അനിജോ തുടങ്ങിയവര്‍ സംബന്ധിച്ചു.