ആഷിഖ് അലി ഇബ്രാഹിം

മുക്കം: ഏറെ ദയനീയമാണ് ചാലിയാറിന്റെ പ്രധാന പോഷകനദിയായ ഇരുവഴിഞ്ഞിപ്പുഴയുടെ അവസ്ഥ. ജില്ലയുടെ കിഴക്കന്‍ മലയോര ഗ്രാമങ്ങളുടെ പ്രധാന കുടിവെള്ള സ്രോതസും നിരവധി വിനോദസഞ്ചാര സാധ്യതകള്‍ നിലനില്‍ക്കുന്നതുമായ ഇരുവഴിഞ്ഞിപ്പുഴ ഇന്ന് അതിജീവനത്തെ കൊതിക്കുകയാണ്. നിരന്തരമായ ചൂഷണങ്ങളും കൈയേറ്റങ്ങളും മാലിന്യനിക്ഷേപവും അധികൃതരുടെ അവഗണനകളും പുഴയുടെ സ്വാഭാവിക തനിമയെ നശിപ്പിച്ചിരിക്കുന്നു. കോടഞ്ചേരി പഞ്ചായത്തിലെ വെള്ളരിമലയില്‍നിന്ന് ഉത്ഭവിച്ച് തിരുവമ്പാടി, മുക്കം, കാരശ്ശേരി, കൊടിയത്തൂര്‍ പഞ്ചായത്തുകളിലൂടെ ഒഴുകി ചാത്തമംഗലം പഞ്ചായത്തിലെ കൂളിമാട്ടില്‍ വച്ചാണ് ഇരുവഴിഞ്ഞിപ്പുഴ ചാലിയാറില്‍ ചേരുന്നത്. മലയാളത്തിലെ വിഖ്യാത സാഹിത്യകാരന്‍ എസ്.കെ പൊറ്റെക്കാട്ടിന്റെ ആദ്യ നോവലായ 'നാടന്‍ പ്രേമ' മടക്കം നിരവധി സാഹിത്യകലാ സൃഷ്ടികള്‍ക്ക് ഇതിവൃത്തമായ ഇരുവഴിഞ്ഞിപ്പുഴയെ സംരക്ഷിക്കണമെന്ന മുറവിളികള്‍ക്ക് കാലങ്ങളോളം പഴക്കമുണ്ട്.
മുന്‍പ് വ്യാപകമായി നടന്ന അനധികൃത മണലൂറ്റ് മൂലം ഇരുവഴിഞ്ഞി പ്പുഴയുടെ സ്വാഭാവിക നീരൊഴുക്കില്‍ വ്യതിയാനം സംഭവിച്ചിരുന്നു. ആയിരക്കണക്കിനു കിണറുകള്‍ അടക്കമുള്ള ജലസംഭരണികളുടെ മുഖ്യസ്രോതസായ ഇരുവഴിഞ്ഞിപ്പുഴയുടെ ഓരോ മാറ്റവും നിരവധി കുടുംബങ്ങളെയാണ് നേരിട്ടുബാധിക്കുന്നത്. വേനല്‍ക്കാലത്തുപോലും സമൃദ്ധമായി ഒഴുകിയിരുന്ന പുഴ കഴിഞ്ഞ കുറച്ചുവര്‍ഷങ്ങളായി വരള്‍ച്ചയുടെ ലക്ഷണങ്ങള്‍ കാണിക്കുന്നതായി പരിസ്ഥിതി പ്രവര്‍ത്തകര്‍ ചൂണ്ടിക്കാട്ടുന്നു.
ഇപ്പോള്‍ പുഴയില്‍ അസാധാരണമാംവിധം ജലനിരപ്പു താഴ്ന്നത് ജനങ്ങളെ വലിയ രീതിയില്‍ ആശങ്കപ്പെടുത്തിയിട്ടുണ്ട്. എന്നാലും 'എന്റെ സ്വന്തം ഇരുവഞ്ഞി' കൂട്ടായ്മ പോലെയുള്ള നിരവധി സന്നദ്ധസംഘടനകളും വിദ്യാര്‍ഥികളും പരിസ്ഥിതിപ്രവര്‍ത്തകരും ഇരുവഴിഞ്ഞിപ്പുഴ സംരക്ഷണത്തിന് മുന്നിട്ടിറങ്ങുന്നത് വലിയ പ്രതീക്ഷയാണു നല്‍കുന്നത്.

അവബോധമില്ലായ്മ പ്രധാന പ്രശ്‌നം

ശക്തമായ ബോധവല്‍ക്കരണങ്ങളുടെ അഭാവവും പുഴസംരക്ഷണത്തില്‍ തദ്ദേശ സ്വയംഭരണ സ്ഥാപനങ്ങള്‍ അടക്കമുള്ള ഔദ്യോഗിക സംവിധാനങ്ങള്‍ക്ക് താല്‍പര്യമില്ലാത്തതും ചൂഷണങ്ങള്‍ക്കെതിരേ നിയമനടപടികള്‍ സ്വീകരിക്കാത്തതും പ്രശ്‌നം ഗുരുതരമാക്കുന്നു. ജലാശയങ്ങളില്‍ മാലിന്യങ്ങള്‍ നിക്ഷേപിക്കുന്നവര്‍ക്കെതിരേ കേരള ഇറിഗേഷന്‍ ആന്‍ഡ് വാട്ടര്‍ കണ്‍സര്‍വേഷന്‍ (ഭേദഗതി) ഓര്‍ഡിനന്‍സ് 2017, 1994 ലെ കേരള പഞ്ചായത്തീരാജ് ആക്ട്, കേരള മുനിസിപ്പാലിറ്റി ആക്ട് എന്നിവ പ്രകാരം തദ്ദേശസ്ഥാപനങ്ങള്‍ക്ക് നിയമനടപടി സ്വീകരിക്കാം. എന്നാല്‍ ഇതു പലപ്പോഴും പ്രഹസനമാകാറാണു പതിവ്. മുക്കം നഗരത്തിലെ കോഴിവേസ്റ്റ് അടക്കമുള്ള ഭൂരിഭാഗം മാലിന്യങ്ങളും തള്ളുന്നത് ഇരുവഴിഞ്ഞിപ്പുഴയിലേക്കാണ്. ഒപ്പം ഗാര്‍ഹിക മാലിന്യങ്ങളും വ്യാപകമായി തള്ളുന്നുണ്ട്. ശാസ്ത്രീയമായ മാലിന്യനിര്‍മാര്‍ജന സംവിധാനങ്ങള്‍ ഒരുക്കിയാല്‍ പുഴകളില്‍ മാലിന്യങ്ങള്‍ തള്ളുന്നത് കുറയുമെന്നു പരിസ്ഥിതി പ്രവര്‍ത്തകര്‍ പറയുന്നു.
അതുപോലെ അനധികൃത മണലൂറ്റിനും നിയന്ത്രണം വേണം. പുഴ സംരക്ഷണമെന്നത് സ്വന്തം കടമയാണെന്ന തിരിച്ചറിവ് ഓരോ മനുഷ്യരിലും വന്നുചേരുമ്പോഴേ ഇതുസംബന്ധമായി നടപ്പാക്കുന്ന പദ്ധതികള്‍ പൂര്‍ണമായും ലക്ഷ്യം നേടുകയുള്ളൂ എന്നും പരിസ്ഥിതി സ്‌നേഹികള്‍ പറയുന്നു.

കരയിടിച്ചില്‍ വലിയ വെല്ലുവിളി

പ്രളയാനന്തരം ഇരുവഴിഞ്ഞിപ്പുഴ നേരിടുന്ന ഏറ്റവും വലിയ വെല്ലുവിളി വ്യാപകമായി കര ഇടിഞ്ഞതാണ്. ചില സ്ഥലങ്ങളില്‍ പത്തു മീറ്ററോളം വരെ ഭൂമി പുഴയില്‍ പതിച്ചിട്ടുണ്ട്. അതിനാല്‍ പുഴയുടെ തീരങ്ങള്‍ സംരക്ഷിക്കുക എന്നതാണ് ഇനി പ്രധാനം. അതിന് അനധികൃത നിര്‍മാണങ്ങളും കൈയേറ്റങ്ങളും കര്‍ശനമായി വിലക്കണം. തൊഴിലുറപ്പ് തൊഴിലാളികളെയും വിവിധ വിദ്യാലയങ്ങളിലെ വിദ്യാര്‍ഥികളെയും സന്നദ്ധസംഘടനകളെയും ഉപയോഗിച്ചുകൊണ്ട് മണ്ണൊലിപ്പ് തടയുന്ന പുഴമഞ്ഞി പോലെയുള്ള മരങ്ങള്‍ പുഴയുടെ തീരങ്ങളില്‍ വച്ചുപിടിപ്പിക്കണം.
കയര്‍ഭൂവസ്ത്രം സ്ഥാപിക്കുന്നതിനും ആവശ്യമായ ഇടങ്ങളില്‍ കല്ലുകൊണ്ട് കെട്ടി സംരക്ഷിക്കുന്നതിനും നടപടി വേണം. പുഴയുടെ നൂറുമീറ്റര്‍ ചുറ്റളവില്‍ നിര്‍മാണ പ്രവര്‍ത്തനങ്ങള്‍ നടത്തുന്നതിനു നിയന്ത്രണങ്ങള്‍ കൊണ്ടുവരണം. മുക്കം നഗരസഭയുടെ നേതൃത്വത്തില്‍ കഴിഞ്ഞദിവസം തോണിയാത്ര നടത്തി ഇരുവഴിഞ്ഞിപ്പുഴ സംരക്ഷിക്കുന്നതിനുള്ള പ്രവര്‍ത്തനങ്ങള്‍ക്കു രൂപം നല്‍കിയിരുന്നു. ഇത് മറ്റു തദ്ദേശസ്ഥാപനങ്ങളും മാതൃകയാക്കണമെന്നാണു പരിസ്ഥിതി പ്രവര്‍ത്തകര്‍ ആവശ്യപ്പെടുന്നത്.

പുഴസംരക്ഷണത്തിന് മുന്നിട്ടിറങ്ങാം

മാസങ്ങള്‍ക്കു മുന്‍പുണ്ടായ പ്രളയത്തിനു ശേഷം ഇരുവഴിഞ്ഞിപ്പുഴ അതിന്റെ സ്വാഭാവികത വീണ്ടെടുത്തതായി പരിസ്ഥിതി പ്രവര്‍ത്തകര്‍ ചൂണ്ടിക്കാട്ടുന്നു. മണലൂറ്റ് മൂലം രൂപപ്പെട്ട ഗര്‍ത്തങ്ങള്‍ അടയുകയും മാലിന്യങ്ങള്‍ പരമാവധി ഒഴുകിപ്പോയിരിക്കുകയും ചെയ്തിട്ടുണ്ട്. അടിത്തട്ടിലെ ചെളിയും മണ്ണും ഒലിച്ചുപോയി പകരം സംഭരണശേഷി കൂടിയ മണല്‍ വന്നടിഞ്ഞു.
ഇതു പുഴയെ സംരക്ഷിക്കാനുള്ള ഏറ്റവും നല്ല അവസരമാണെന്ന് എന്റെ സ്വന്തം ഇരുവഴിഞ്ഞി കൂട്ടായ്മ ചെയര്‍മാന്‍ പി.കെ.സി മുഹമ്മദ് പറയുന്നു. ഇനി വേണ്ടത് ജനകീയ കൂട്ടായ്മകളിലൂടെ ഇടപെടലുകള്‍ നടത്തുക എന്നതാണ്.
തദ്ദേശ സ്ഥാപനങ്ങളെ മാത്രം ആശ്രയിച്ചതുകൊണ്ട് കാര്യമില്ലെന്നും പുഴയെ ഓരോ ഭാഗങ്ങളായി വിഭജിച്ച് ആ നാട്ടിലെ സന്നദ്ധസംഘടനകളെ അതിന്റെ സംരക്ഷണം ഏല്‍പ്പിക്കണമെന്നും അദ്ദേഹം നിര്‍ദേശിക്കുന്നു. പുഴയും മനുഷ്യനും തമ്മിലുള്ള ഇടപെടലുകള്‍ സജീവമാക്കാന്‍ കുളിക്കടവുകള്‍ പുനരുജ്ജീവിപ്പിക്കാന്‍ അധികൃതര്‍ നടപടിയെടുക്കണം. ഇതരസംസ്ഥാന തൊഴിലാളികള്‍ പ്രാഥമിക ആവശ്യങ്ങള്‍ നിറവേറ്റാന്‍ കൂടുതലും ആശ്രയിക്കുന്നത് പുഴകളെയാണ്. പൊതു ശൗചാലയങ്ങള്‍ നിര്‍മിച്ച് ഇത്തരം പ്രവണതകള്‍ തടയണം.
പാലങ്ങള്‍ ഉള്ളിടത്താണ് കൂടുതലായും വാഹനങ്ങളിലും മറ്റുമായെത്തി മാലിന്യങ്ങള്‍ നിക്ഷേപിക്കുന്നത് എന്നതിനാല്‍ ഇവിടങ്ങളില്‍ സി.സി.ടി.വി കാമറകള്‍ സ്ഥാപിക്കണം. സ്‌കൂളുകള്‍, ഗ്രാമസഭകള്‍, ബസ് സ്റ്റാന്‍ഡുകള്‍, അങ്ങാടികള്‍, പൊതുഇടങ്ങള്‍ എന്നിവയെല്ലാം കേന്ദ്രീകരിച്ച് പുഴ സംരക്ഷിക്കേണ്ടതിന്റെ ആവശ്യകതകളെ കുറിച്ചുള്ള ബോധവല്‍ക്കരണ പ്രവര്‍ത്തനങ്ങള്‍ ഊര്‍ജിതമാക്കണം-അദ്ദേഹം പറഞ്ഞു.