കൊട്ടാരക്കര:  റൂറല്‍ ജില്ലാ പൊലിസ് നടത്തിയ പ്രത്യേക പരിശോധനയില്‍ ദീര്‍ഘകാലമായി ഒളിവിലായിരുന്ന 539 പിടികിട്ടാപുള്ളികള്‍ അറസ്റ്റിലായതായി റൂറല്‍ ജില്ലാ പൊലിസ് മേധാവി എസ് സുരേന്ദ്രന്‍  അറിയിച്ചു. ഒരു മാസക്കാലമായി നടത്തിയ പ്രത്യേക പരിശോധനയിലാണ് ഇത്രയും കുറ്റവാളികള്‍ പിടിയിലായത്. സ്ത്രീകള്‍ക്കും കുട്ടികള്‍ക്കും എതിരെയുള്ള അതിക്രമം, അബ്കാരി, മോഷണം, പിടിച്ചുപറി, അടിപിടി തുടങ്ങിയ കുറ്റകൃത്യങ്ങളില്‍ കേസായ ശേഷം ഒളിവില്‍ കഴിഞ്ഞിരുന്ന പ്രതികളാണിവര്‍.
10 വര്‍ഷത്തിലേറെയായി ഒളിവില്‍ കഴിഞ്ഞിരുന്ന നിരവധി കുറ്റവാളികളും പിടിയിലായവരില്‍ ഉള്‍പ്പെടുന്നു. പൊതുജന സമാധാനത്തിന് തടസ്സം നില്‍ക്കുന്നവരെയും സാമൂഹ്യവിരുദ്ധ പ്രവര്‍ത്തനങ്ങളില്‍ ഏര്‍പ്പെടുന്നവരെയും നിരന്തരം നിരീക്ഷിക്കുന്നതിനും പിടികൂടുന്നതിനും നിയമ നടപടി സ്വീകരിക്കുന്നതിനുമായി റൂറല്‍ ജില്ലയില്‍ പ്രത്യേക മോണിറ്ററിങ് സംവിധാനം ഏര്‍പ്പെടുത്തിയിട്ടുണ്ട്. ആന്റി ഗുണ്ടാ സ്‌ക്വാഡിന്റെ പ്രവര്‍ത്തനം നടത്തുന്നതിലേക്കായി ഒരു സബ് ഇന്‍സ്‌പെക്ടറുടെ ചുമതലയില്‍ 10 അംഗ പൊലിസ് സംഘത്തെ വിദഗ്ധ പരിശീലനം നല്‍കി നിയോഗിച്ചു. കൊട്ടാരക്കര ഡി.വൈ.എസ്.പി ബി കൃഷ്ണകുമാര്‍, പുനലൂര്‍ എ.എസ്.പി ഡോ. കാര്‍ത്തികേയന്‍ ഗോകുലചന്ദ്രന്‍ എന്നിവര്‍ നേതൃത്വം നല്‍കി.