കഴക്കൂട്ടം: ആര്‍.എസ്.എസുകാരെ പേടിച്ച് പൊലിസ് തന്റെ പിറകെ നടക്കുന്നു. ഒരു നല്ല കാര്യത്തിന് വേണ്ടി മരിക്കാന്‍ പോലും എനിക്ക് വിഷമമില്ല. ഞാന്‍ എന്ത് തെറ്റാണ് ചെയ്തത് എന്നത് കരിങ്കൊടി കാണിയ്ക്കുന്നവരും പ്രതിഷേധിക്കുന്നവരും പറയാന്‍ ബാധ്യസ്ഥരാണ്. ജനാധിപത്യത്തില്‍ പ്രതിഷേധം ഉണ്ടാകണം അതിനെ സ്വാഗതം ചെയ്യുന്നു. ശബരിമല വിഷയത്തില്‍ താനോ സര്‍ക്കാരോ എന്താണ് ചെയ്തത്.
അങ്ങാടിയില്‍ തോറ്റതിന് അമ്മയോടൊന്ന് ചൊല്ലുണ്ട് അതിനെ അനര്‍ഥമാകുന്ന നിലയിലാണ് കാര്യങ്ങള്‍. കരിങ്കൊടി കാണിച്ച ആര്‍.എസ്.എസിന്റെ ഉന്നതരായിട്ടുള്ള അഞ്ച് വനിതകളാണ് സുപ്രീം കോടതിയില്‍ ഹര്‍ജി ഫയല്‍ ചെയ്തത്. സുപ്രീം കോടതി ഒരു നിയമം പാസാക്കിയാല്‍ ഒരു ഗവര്‍മെന്റിന് നടപ്പിലാക്കിയേ പറ്റൂ. നാളെ ആരെങ്കിലും പുനഃപരിശോധന ഹര്‍ജി കൊടുത്ത് വിധി മറ്റൊന്നായാല്‍ സര്‍ക്കാര്‍ അതും അനുസരിക്കും. സമരം ചെയ്യുന്ന ഈ കൂട്ടര്‍ കേന്ദ്രത്തോട് പറഞ്ഞ് പാര്‍ലമെന്റില്‍ ഒരു നിയമം പാസാക്കിയാല്‍ മതി. അതിന് പകരം നിയമം കയ്യിലെടുത്ത് നാട്ടില്‍ അരാചകത്വം സൃഷ്ടിക്കുകയാണ് എന്നും മന്ത്രി പറഞ്ഞു. ബാര്‍ കോഴ കേസിന്റെ അന്വേഷണ ഉദ്യോഗസ്ഥനായിരുന്ന സുകേശന് ഐ.പി.എസ് കിട്ടിയതുമായി ബന്ധപ്പെട്ട് കുളത്തൂര്‍ പൗരാവലിയും ശ്രീനാരായണ വായനശാലയും സംഘടിപ്പിച്ച സ്വീകരണ ചടങ്ങില്‍ സംസാരിക്കുകയായിരുന്നു അദ്ദേഹം.
തുടര്‍ന്ന് സംസാരിച്ച സുകേശന്‍ ഐ.പി.എസ് തന്റെ ഇനിയുള്ള ഔദ്യോഗിക ജീവിതവും പൂര്‍ണമായും സത്യസന്ധതയും ക്രിയാത്മകവും ആയിരിക്കുമെന്ന് പറഞ്ഞു.
ചടങ്ങില്‍ സി.പി.എം ജില്ലാ കമ്മിറ്റി അംഗം ആറ്റിപ്ര സദാനന്ദന്‍, കെ.പി.സി.സി ജനറല്‍ സെക്രട്ടറി മണ്‍വിള രാധാകൃഷ്ണന്‍, കൗണ്‍സിലര്‍മാരായ മേടയില്‍ വിക്രമന്‍, ശിവദത്ത്, പ്രതിഭ ജയകുമാര്‍ സംസാരിച്ചു.