മട്ടന്നൂര്‍: മടന്നൂര്‍ നഗരത്തിലെ മാലിന്യംതള്ളല്‍ കാരണം ജനങ്ങള്‍ പൊറുതിമുട്ടുന്നു. മട്ടന്നൂരിന്റെ ഹൃദയഭാഗത്തുള്ള മുനിസിപ്പല്‍ കോംപ്ലക്‌സിനു സമീപത്തും ഇരിട്ടി റോഡിലുമെല്ലാം കടകളില്‍നിന്നും സമീപ പ്രദേശത്തുള്ള വീടുകളില്‍നിന്നുമുള്ള മാലിന്യംതള്ളല്‍ വര്‍ധിക്കുന്നതാണ് യാത്രക്കാര്‍ക്കും പ്രദേശവാസികള്‍ക്കും ദുരിതമാകുന്നത്. മുനിസിപ്പാലിറ്റിയുടെ മാലിന്യ വാഹനം നഗരത്തില്‍ എല്ലായിടത്തും എത്താറുണ്ടെങ്കിലും ജീവനക്കാരുടെ കുറവ് സുഗമമായ മാലിന്യനീക്കത്തിന് തടസമാകുന്നുണ്ട്. പലയിടത്തും രാവിലെ 10 മണിയായാലും മാലിന്യം മാറ്റാനാകാത്ത സ്ഥിതിയാണ്.
ഈ മാലിന്യക്കൂമ്പാരത്തിനിടയിലൂടെയാണ് അതിരാവിലെ മുതല്‍ തന്നെ വിദ്യാര്‍ഥികളും ജോലിക്കാരുമടക്കം നിരവധി ആളുകള്‍ കടന്നുപോകുന്നത്. മാലിന്യം തള്ളാന്‍ പെട്ടി സ്ഥാപിച്ചെങ്കിലും ഇപ്പോള്‍ അതും കാണാനില്ല. നഗരത്തിലെ ജനവാസ കേന്ദ്രത്തിനു സമീപം മാലിന്യങ്ങള്‍ ചീഞ്ഞ് ദുര്‍ഗന്ധം വമിക്കുന്ന അവസ്ഥയിലായതോടെ തെരുവുനായ്ക്കളും പെരുകുന്നുണ്ട്. വിമാനത്താവളം പൂര്‍ത്തിയാകുന്നതോടെ അധികൃതര്‍ കണ്ണുതുറക്കുമെന്ന പ്രതീക്ഷയിലാണ് കച്ചവടക്കാരും യാത്രക്കാരും.