ഇരിട്ടി: മലയോര മേഖലലുണ്ടായ പ്രളയത്തിലും ഉരുള്‍പൊട്ടലിലും ഭൂമി വിണ്ടുകീറുകയും വീടുകള്‍ തകരുകയും ചെയ്ത പ്രദേശങ്ങള്‍ ജിയോളജിക്കല്‍ സര്‍വേ ഓഫ് ഇന്ത്യ (ജി.എസ്.ഐ) സംഘം സന്ദര്‍ശിച്ച് പരിശോധന നടത്തി. ജി.എസ്.ഐ തിരുവനന്തപുരം യൂനിറ്റിലെ റണ്‍ജിത്ത് കുമാര്‍ ദാസ്, എം.എസ് രവിനാഥ്, ഭൂഗര്‍ഭ ജലവിഭവ വകുപ്പ് ജില്ലാ ജിയോളജിസ്റ്റ് എസ്. സന്തോഷ് എന്നിവരുടെ നേതൃത്വത്തിലാണ് ഇരിട്ടി താലൂക്കില്‍ സന്ദര്‍ശനം നടത്തുന്നത്.
കീഴൂര്‍ വില്ലേജിലെ എടക്കാനം പ്രദേശത്താണ് സംഘം ആദ്യമെത്തിയത്. കുന്നിടിച്ചിലില്‍ തകര്‍ന്ന എടക്കാനം നെല്ലാറയ്ക്കല്‍ മഠത്തിനകത്ത് ബേബിയുടെ ഇരുനില കോണ്‍ക്രീറ്റ് വീടിന്റെ പ്രദേശം സംഘം പരിശോധിച്ചു. കീഴൂര്‍കുന്ന്, കീഴൂര്‍, പാലാപ്പറമ്പ് മേഖലകളില്‍ ഭൂമി വിണ്ടുകീറിയ പ്രതിഭാസങ്ങളും സംഘം പരിശോധിച്ചു. കീഴൂര്‍ വില്ലേജിലെ എടക്കാനം, കീഴൂര്‍, പാലാപറമ്പ്, വയത്തൂര്‍ വില്ലേജിലെ കാലാങ്കി എന്നിവിടങ്ങളിലാണ് സംഘം ഇന്നലെ പരിശോധന നടത്തിയത്. ഭൂമി വിണ്ടുകീറല്‍, കുന്നിടിച്ചില്‍ എന്നിവയുടെ കാരണങ്ങള്‍, ഇവയെ പ്രതിരോധിക്കാനും മുന്‍ കരുതലുകളെടുക്കാനുള്ള മാര്‍ഗങ്ങള്‍ എന്നിവ സംബന്ധിച്ച് പരിസ്ഥിതി മന്ത്രാലയത്തിനും സംസ്ഥാന സര്‍ക്കാരിനും സംഘം റിപ്പോര്‍ട്ട് സമര്‍പ്പിക്കും. പരിശോധന ഇന്ന് പൂര്‍ത്തിയാകും. താലൂക്കിലെ പുഴകളില്‍ വന്നടിഞ്ഞ മണല്‍ ശേഖരങ്ങളുടെ കണക്കെടുപ്പും വിവിധ വകുപ്പുകളുടെ സംയുക്ത നേതൃത്വത്തില്‍ ആരംഭിച്ചു.