കാഞ്ഞിരപ്പള്ളി: ജീവരക്ഷയ്ക്കായ് സുമനസ്സുകളുടെ സഹായം തേടുകയാണ് റിയാസ് മോന്‍. തലച്ചോറില്‍ ഹോര്‍മോണ്‍ കുറയുന്ന അപൂര്‍വ രോഗം ബാധിച്ച് ചികിത്സയില്‍ കഴിയുകയാണ് കൂവപ്പള്ളി നെടുമല ഇടമനയില്‍ ഇ.എം.കാസിമിന്റെ മകനായ ഈ പതിനാലുകാരന്‍.
എരുമേലി സെന്റ് തോമസ് ഹൈസ്‌ക്കൂളിലെ എട്ടാം ക്ലാസ് വിദ്യാര്‍ത്ഥിയായ റിയാസ് മോന്‍ അസുഖം മൂലം പല ദിവസങ്ങളിലും സ്‌കൂളില്‍ ഹാജരാകുവാന്‍ സാധിക്കുന്നില്ലെങ്കില്‍ പോലും പഠനത്തില്‍ വളരെ മിടുക്കനാണെന്ന് അധ്യാപകര്‍ സാക്ഷ്യപ്പെടുത്തുന്നു.
ദിനംപ്രതിയുള്ള കുത്തിവെയ്പ്പിലൂടെ ഹോര്‍മോണിന്റെ അളവ് വര്‍ദ്ധിപ്പിക്കുക മാത്രമാണ് രോഗം ഭേദമാകുന്നതിനായുള്ള ഏക മാര്‍ഗം. അഞ്ചു വര്‍ഷം തുടര്‍ച്ചയായി ചികിത്സിച്ചാല്‍ രോഗം ഭേദമാകുമെന്ന് ഡോക്ടര്‍മാര്‍ പറയുന്നു. ദിനേന കുത്തിവെയ്പിനായുള്ള മരുന്നിന് ആയിരം രൂപയോളം ചെലവ് വരും. സാമ്പത്തികമായി വളരെ പിന്നോക്കാവസ്ഥയില്‍ നില്ക്കുന്ന നിര്‍ദ്ധന കുടുംബത്തിന് ഭാരിച്ച തുക കണ്ടെത്തുവാന്‍ മാര്‍ഗമില്ല. ചികില്‍സ തുടങ്ങി ഒന്നര വര്‍ഷം പിന്നിട്ട റിയാസ് മോന് മൂന്നരവര്‍ഷം കൂടി ചികില്‍സ ലഭിച്ചാല്‍ മാത്രമേ അപൂര്‍വ്വ രോഗത്തില്‍ നിന്നും മുക്തി ലഭിക്കുകയുള്ളൂ. ഇതിനായി സന്മനസുള്ളവരുടെ കനിവിനായി കാത്തിരിക്കുകയാണ് ഈ നിര്‍ദ്ധന കുടുംബം.
റിയാസ് മോന്റെ ചികിത്സയ്ക്ക് മാര്‍ഗം തേടി ഗ്രാമപഞ്ചായത്തംഗം വി.സജിന്റെയും പിതാവ് കാസിമിന്റെയും പേരില്‍ സ്റ്റേറ്റ് ബാങ്ക് ഓഫ് ഇന്ത്യയില്‍ ജോയിന്റ് അക്കൗണ്ടും ആരംഭിച്ചിട്ടുണ്ട്. അക്കൗണ്ട് നമ്പര്‍ .35819954073. ഐ എഫ് സി കോഡ് എസ്.ബി ഐ എന്‍ 0010696.