തൊടുപുഴ: കോടിക്കുളം ഗ്ലോബല്‍ ഇന്ത്യന്‍ പബ്ലിക് സ്‌കൂള്‍ പ്രിന്‍സിപ്പല്‍ സ്ഥാനത്ത് നിന്നും തോമസ് ജെ. കാപ്പനെ സസ്‌പെന്റ് ചെയ്ത സംഭവത്തെത്തുടര്‍ന്ന് രണ്ടാം ദിവസവും സംഘര്‍ഷ ഭരിതം. തഹസില്‍ദാറുടെ നേതൃത്വത്തില്‍ നടത്തിയ ചര്‍ച്ചയും തുടര്‍ന്ന് കൈക്കൊണ്ട തീരുമാനവും നടപ്പാക്കാന്‍ മാനേജ്‌മെന്റ് തയാറാകാതിരുന്നതാണ് വീണ്ടും സംഘര്‍ഷത്തിലെത്തിയത്. പ്രവേശനോത്സവ ദിനമായ വ്യാഴാഴ്ച മാനേജ്‌മെന്റും അധ്യാപക രക്ഷിതാക്കളും തമ്മില്‍ ഉണ്ടായ സംഘര്‍ഷത്തെത്തുടര്‍ന്ന് തഹസില്‍ദാറുടെ നേതൃത്വത്തില്‍ നടത്തിയ ചര്‍ച്ചയില്‍ പ്രിന്‍സിപ്പല്‍ തോമസ് ജെ. കാപ്പനെ തിരിച്ചെടുക്കാനും ഇന്ന് പഠനം തുടങ്ങാനും തീരുമാനമായിരുന്നു. ഇന്ന് പഠനം ആരംഭിക്കുമെന്ന് കാട്ടി വിദ്യാര്‍ഥികള്‍ക്ക് പ്രിന്‍സിപ്പല്‍ നിര്‍ദേശം നല്‍കുയും ചെയ്തിരുന്നു.
എന്നാല്‍ മണിക്കൂറുകള്‍ക്കകം ഇന്ന് ക്ലാസ് തുടങ്ങില്ലെന്ന് വൈസ് പ്രിന്‍സിപ്പല്‍ ഫോണ്‍ സന്ദേശം നല്‍കുകയായിരുന്നു. വൈകിട് മാനേജ്‌മെന്റ് പത്രക്കുറിപ്പും ഇറക്കി. രാത്രിയോടെ സ്‌കൂളില്‍ നിന്നും വൈസ് പ്രിന്‍സിപ്പലിന്റെ പേരിലാണ് വിദ്യാര്‍ഥികള്‍ക്ക് സ്‌കൂളിന് അവധി നിര്‍ദേശം പോയിരിക്കുന്നത്.
ഇന്നലെ രാവിലെ വിദ്യാര്‍ഥികളും രക്ഷിതാക്കളും എത്തിയപ്പോള്‍ മാനേജ്‌മെന്റ് പ്രതിനിധികള്‍ സ്‌കൂള്‍ ഗേറ്റ് പുറത്ത് നിന്നും പൂട്ടിയിട്ടിരുന്നു. ക്ഷുഭിതരായ വിദ്യാര്‍ഥി രക്ഷിതാക്കള്‍ തൊടുപുഴ വണ്ണപ്പുറം റോഡ് ഉപരോധിച്ചു. തുടര്‍ന്ന് സംഭവമറിഞ്ഞ് സ്ഥലത്ത് എത്തിയ കാളിയാര്‍ എസ്.ഐയുമായി നടത്തിയ ചര്‍ച്ചയെത്തുടര്‍ന്ന് വിദ്യാര്‍ഥികളും രക്ഷിതാക്കളും പിരിഞ്ഞ് പോയി. വിഷയത്തില്‍ ആര്‍.ഡി.ഒ മാനേജ്‌മെന്റുമായി ചര്‍ച്ച നടത്തി. ഇന്ന് പി.ടി.എ പ്രതിനിധികളെ ആര്‍.ഡി.ഒ ചര്‍ച്ചയ്ക്ക് വിളിച്ചിട്ടുണ്ട്.