നെയ്യാറ്റിന്‍കര: ആലുംമൂട്, ജനറല്‍ ആശുപത്രി ജങ്ഷന്‍, റെയില്‍വേ സ്റ്റേഷന്‍ റോഡും പരിസരവും ടി.ബി ജങ്ഷന്‍, പബ്ലിക് മാര്‍ക്കറ്റും പരിസരവും തെരുവുനായക്കളുടെ ശല്യം കൊണ്ട് ജനങ്ങള്‍ പൊറുതിമുട്ടുന്നു.
അടുത്ത ദിവസങ്ങളിലായി കൊച്ചു കുട്ടികള്‍ക്കും മുതിര്‍ന്നവരുമടക്കം നിരവധി പേര്‍ക്ക് നായ്ക്കളുടെ കടിയേറ്റു. രാത്രികാലങ്ങളില്‍ വീടുകളിലെ വളര്‍ത്തു മൃഗങ്ങള്‍ക്കും കൂട്ടത്തോടെയെത്തുന്ന നായ്ക്കളുടെ കടിയേല്‍ക്കുന്നതായും പരാതിയുണ്ട്.
താലൂക്കിലെ തന്നെ ആറാലുംമൂട്, തേമ്പാമുട്ടം, മുണ്ടുക്കോണം, അമരവിള ഭാഗങ്ങളിലും നായ്ക്കളുടെ ശല്യം രൂക്ഷമാകുന്നതായി പരാതിയുണ്ട്. നെയ്യാറ്റിന്‍കര തൂലൂക്ക് ഓഫിസിനു സമീപം റോഡിനു വശത്തായി പാര്‍ക്ക് ചെയ്തിരിക്കുന്ന പാരലല്‍ സര്‍വിസ് വാഹനങ്ങളുടെ അടിയിലായി കൂട്ടത്തോടെ കിടക്കുന്ന നായ്ക്കള്‍ വിവിധ ആവശ്യങ്ങക്കായി ഈ ഭാഗത്ത് എത്തിച്ചേരുന്ന ആള്‍ക്കാരെ കൂട്ടം ചേര്‍ന്ന് കടിച്ച സംഭവങ്ങളും നിരവധി.
നായ്ക്കളെ തുരത്താന്‍ നഗരസഭ അടിയന്തര നടപടി സ്വീകരിക്കണമെന്ന് നാട്ടുകാരും വിവിധ റസിഡന്‍സ് അസോസിയേഷനുകളും ആവശ്യപ്പെടുന്നു.