പേരൂര്‍ക്കട: ആത്മഹത്യാ ഭീഷണിയും കുപ്പിച്ചില്ലേറും നടത്തിയ മാനസികാരോഗ്യ കേന്ദ്രത്തിലെ അന്തേവാസിയെ പേരൂര്‍ക്കട പൊലിസ് പിടികൂടി. വെള്ളിയാഴ്ച രാവിലെ പതിനൊന്ന് മണിയോടെയായിരുന്നു സംഭവം.ബംഗാള്‍ സ്വദേശി കനയ്യകുമാറാ (27) ണ് ആറാം വാര്‍ഡില്‍ നിന്ന് രക്ഷപ്പെട്ട് ഭീഷണി മുഴക്കിയത്.
ഇയാള്‍ ആറാം വാര്‍ഡിന്റെ മുകളില്‍ കയറി താന്‍ ആത്മഹത്യ ചെയ്യാന്‍ പോകുകയാണെന്ന് വിളിച്ചു പറയുകയായിരുന്നു. കൈവശം ഒരു ബാഗും സൂക്ഷിച്ചിരുന്നു. ഈ ബാഗില്‍ നിറയെ കുപ്പിച്ചില്ലുകളായിരുന്നു.തന്നെ പിടിക്കാന്‍ വന്ന ജീവനക്കാരേയും പൊലിസുകാരെയും കുപ്പിച്ചില്ല് എറിഞ്ഞ് അകറ്റി. ബാഗിലുണ്ടായിരുന്നകുപ്പിച്ചില്ല് തീര്‍ന്നതോടെ പേരൂര്‍ക്കട എസ്.ഐ ശ്രീകാന്തിന്റെ നേതൃത്വത്തിലെത്തിയ പൊലിസ് സംഘവും ആശുപത്രിയിലെ സുരക്ഷാ ജീവനക്കാരും പിടികൂടാനായെത്തി. ഇതു കണ്ട് ഇയാള്‍ താഴേക്ക് ചാടി പത്താം വാര്‍ഡിനു സമീപത്തായുള്ള ഒരു ചെറിയ ഓടയിലൂടെ നുഴഞ്ഞു കയറി പുറത്തേക്കിറങ്ങിയെങ്കിലും പിന്നാലെയെത്തിയ പൊലിസും ജീവനക്കാരും ചേര്‍ന്ന് പിടികൂടി.
മാവേലിക്കരയില്‍ ട്രെയിന്‍ യാത്രക്കാരെ ഉപദ്രവിച്ച കേസില്‍ പിടിയിലായ ഇയാളെ മാനസികാ അസ്വസ്ഥത പ്രകടിപ്പിച്ചതിനെത്തുടര്‍ന്ന് കോടതി നിര്‍ദേശപ്രകാരമാണ് മാനസികാരോഗ്യ കേന്ദ്രത്തിലെത്തിച്ചത്.