പാറശാല: യുവാവിനെ വീട്ടിനുളളില്‍ വെട്ടിക്കൊലപ്പെടുത്തിയ നിലയില്‍ കണ്ടെത്തി. പാറശാല കൊടവിളാകം പറങ്കിമാംവിള വീട്ടില്‍ ശ്രീധരന്‍-സരസ്വതി ദമ്പതികളുടെ മകന്‍ സന്തോഷിനെ (26) യാണ് വീട്ടിനുളളില്‍ വെട്ടേറ്റ് മരിച്ച നിലയില്‍ കണ്ടെത്തിയത്. സംഭവത്തിനു ശേഷം വീട്ടുകാര്‍ ഒളിവിലാണ്. ഇന്നലെ രാവിലെ അയല്‍വാസികളാണ് സന്തോഷിനെ രക്തത്തില്‍ കുളിച്ച് കിടക്കുന്ന നിലയില്‍ കണ്ടെത്തിയത്. ഇവര്‍ പാറശാല പൊലിസില്‍ വിവരം അറിയിക്കുകയായിരുന്നു.
മദ്യപാനിയും കഞ്ചാവിനും ലഹരിക്കും അടിമയായ സന്തോഷ് വീട്ടില്‍ വഴക്കുണ്ടാക്കുന്നതും മാതാപിതാക്കളെ മര്‍ദിക്കുന്നതും പതിവായിരുന്നെന്നും പൊലിസ് പറഞ്ഞു. കൂടാതെ ഇയാള്‍ കഞ്ചാവ് കേസിലെ പ്രതിയുമാണ്.
കൊല നടന്നതായി കണക്കാക്കുന്ന വ്യാഴാഴ്ച രാത്രിയിലും സന്തോഷ് വീട്ടില്‍ വഴക്കുണ്ടാക്കിയിരുന്നതായി സമീപവാസികള്‍ പറയുന്നു. മകന്റെ പരാക്രമങ്ങള്‍ സഹിക്കവയ്യാതെ പിതാവ് തന്നെ കൊല നടത്തിയതെന്നാണ് പൊലിസ് നിഗമനം. ഒളിവില്‍ കഴിഞ്ഞിരുന്ന മാതാവും സഹോദരനും പൊലിസില്‍ കീഴടങ്ങിയതായി റിപ്പോര്‍ട്ടുണ്ട്. എന്നാല്‍ പൊലിസ് ഇക്കാര്യം സ്ഥിരീകരിച്ചിട്ടില്ല. മാതാവ് കുറ്റം സ്വയം ഏറ്റെടുക്കാന്‍ തയാറായാതായും വിവരമുണ്ട്. ഓട്ടോ ഡ്രൈവറായ സന്തോഷ് അവിവാഹിതനാണ്.
വിരലടയാള വിദഗ്ധര്‍ , ഡോഗ് സ്‌ക്വാഡ് തുടങ്ങിയവര്‍ സ്ഥലത്തെത്തി തെളിവുകള്‍ ശേഖരിച്ചു. നെയ്യാറ്റിന്‍കര ഡിവൈ.എസ്.പി ഹരികുമാറിന്റെ നേതൃത്വത്തിലാണ് അന്വേഷണം. പാറശാല പൊലിസ് ഇന്‍ക്വസ്റ്റ് തയാറാക്കിയശേഷം മൃതദേഹം പോസ്റ്റ്‌മോര്‍ട്ടത്തിനായി മെഡിക്കല്‍ കോളജ് ആശുപത്രിയിലേക്ക് മാറ്റി.