മങ്കട: പുതിയ അധ്യയന വര്‍ഷം മങ്കട മണ്ഡലത്തിലെ എട്ടു സര്‍ക്കാര്‍ സ്‌കൂളുകള്‍ക്കുള്ള ബസുകള്‍ വിതരണം ചെയ്തു. മണ്ഡലം സമഗ്ര വിദ്യാഭ്യാസ പദ്ധതി 'മാര്‍ക്കബ്ള്‍ മങ്കട'യുടെ ഭാഗമായാണ് സര്‍ക്കാര്‍ സ്‌കൂളുകള്‍ക്ക് ബസുകള്‍ അനുവദിച്ചത്. ടി.എ അഹമ്മദ് കബീര്‍ എം.എല്‍.എയുടെ 2015-16 സാമ്പത്തിക വര്‍ഷത്തെ ആസ്തി വികസന ഫണ്ടണ്ടില്‍ നിന്നും അനുവദിച്ച 129 ലക്ഷം രൂപ ഉപയോഗിച്ചാണ് ഫണ്ടണ്ട് അനുവദിച്ചത്.
മങ്കട പള്ളിപ്പുറം ഹയര്‍ സെക്കന്‍ഡറി, മങ്കട പള്ളിപ്പുറം ജി.യു.പി സ്‌കൂള്‍, മങ്കട ഗവ. ഹൈസ്‌കൂള്‍, ചേരിയം ഹൈസ്‌കൂള്‍, കടുങ്ങപുരം ഗവ. ഹൈസ്‌കൂള്‍, പനങ്ങാങ്ങര ജി.യു.പി സ്‌കൂള്‍, മക്കരപ്പറമ്പ് ഗവ. ഹയര്‍ സെക്കന്‍ഡറി സ്‌കൂള്‍, പാങ്ങ് ഹയര്‍ സെക്കന്‍ഡറി സ്‌കൂള്‍ എന്നീ വിദ്യാലയങ്ങള്‍ക്കാണ് ബസുകള്‍ നല്‍കിയത്. നിയുക്ത എം.പി പി.കെ കുഞ്ഞാലിക്കുട്ടി ബസുകളുടെ വിതരണോദ്ഘാടനവും താക്കോല്‍ ദാനവും നിര്‍വഹിച്ചു.
ടി.എ അഹമ്മദ് കബീര്‍ എം.എല്‍.എ അധ്യക്ഷനായി. ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, മങ്കട ബ്ലോക്ക് പ്രസിഡന്റ് ഇ. സഹീദ, ജില്ലാ പഞ്ചായത്ത് അംഗങ്ങളായ ഉമ്മര്‍ അറയ്ക്കല്‍, എം.ടി സലീന, പഞ്ചായത്ത് പ്രസിഡന്റുമാര്‍, ബ്ലോക്ക് അംഗങ്ങള്‍, എച്ച്.എം ടി മുഹമ്മദ്, പ്രിന്‍സിപ്പല്‍മാരായ എം.പി കരീം, സമീറ കെ.വി, ഡി.ഡി.ഇ ട്രൈനി ഇബ്രാഹീം, ബി.പി.ഒ ഹരിദാസന്‍, ഡയറ്റ് പാക്കല്‍റ്റി ഇ.കെ നിഷ, മങ്കട എ.ഇ.ഒ കെ.എസ് ഷാജന്‍ തുടങ്ങിയവര്‍ സംസാരിച്ചു.