റിയാദ്: സൗഹൃദ മത്സരങ്ങള്‍ക്കായി സഊദി സന്ദര്‍ശിക്കുന്ന അര്‍ജന്റീനിയന്‍ ടീമിന് ആദ്യ മത്സരത്തില്‍ മികച്ച ജയം. ഏഷ്യന്‍ ടീമായ ഇറാഖിനെ എതിരില്ലാത്ത നാലുഗോളുകള്‍ക്കാണ് അര്‍ജന്റീന തകര്‍ത്തത്. സീനിയര്‍ താരങ്ങള്‍ക്ക് വിശ്രമം നല്‍കി യുവതാരങ്ങളായിരുന്നു ഇറാഖിനെതിരേ മത്സരത്തിനിറങ്ങിയത്.
18-ാം മിനുട്ടില്‍ ലൊതാറോ മാര്‍ട്ടിനെസ് ആയിരുന്നു ആദ്യ ഗോള്‍ നേടിയത്. 53-ാം മിനുട്ടില്‍ റോബര്‍ട്ടോ പെരേര രണ്ടാം ഗോള്‍ നേടി. 82-ാം മിനുട്ടില്‍ ജര്‍മന്‍ പെസല്ലയും 91-ാം മിനുട്ടില്‍ ഫ്രാങ്കോ കെര്‍വിയും അര്‍ജന്റീനക്കായി ലക്ഷ്യം കണ്ടു.
ഇതിഹാസതാരവും ക്യാപ്റ്റനുമായ ലയണല്‍ മെസ്സി തുടര്‍ച്ചയായ മൂന്നാം മത്സരത്തിലും കളിക്കാതിരുന്നിട്ടും അത് അര്‍ജന്റീനയുടെ പ്രകടനത്തെ സാരമായി ബാധിച്ചില്ല.
റഷ്യന്‍ ലോകകപ്പിലെ ദുരന്തത്തിനു ശേഷം അര്‍ജന്റീനയുടെ താല്‍ക്കാലിക കോച്ചായി നിയമിക്കപ്പെട്ട ലയണല്‍ സ്‌കലോനിക്കു കീഴില്‍ ടീം ശരിയായ ദിശയിലാണെന്നു തെളിയിക്കുന്നതായിരുന്നു ഇറാഖിനെതിരായ പ്രകടനം.
സീനിയര്‍ താരങ്ങളെയെല്ലാം മാറ്റിനിര്‍ത്തി ദേശീയ ലീഗില്‍ കളിക്കുന്ന പുതുമുഖങ്ങള്‍ക്കു പ്രാധാന്യം നല്‍കിയുള്ള ടീമിനെയാണ് തുടക്കം മുതല്‍ സ്‌കലോനി പരീക്ഷിച്ചത്. ഇറാഖി ഗോള്‍കീപ്പറുടെ ചില തകര്‍പ്പന്‍ സേവുകള്‍ ഇല്ലായിരുന്നെങ്കില്‍ അര്‍ജന്റീനയുടെ വിജയമാര്‍ജിന്‍ ഇതിനേക്കാള്‍ വലുതാവുമായിരുന്നു. അര്‍ജന്റീനയുടെ അടുത്ത മത്സരം 16ന് ബ്രസീലിനെതിരേയാണ്.