കൊച്ചി: സംസ്ഥാന സീനിയര്‍ ഫുട്‌ബോള്‍ ചാംപ്യന്‍ഷിപ്പിന്റെ ഫൈനലില്‍ തൃശൂരും കോട്ടയവും കൊമ്പുകോര്‍ക്കും. ഇന്നലെ നടന്ന രണ്ടാം സെമിയില്‍ പാലക്കാടിനെ എതിരില്ലാത്ത നാലു ഗോളുകള്‍ക്ക് പരാജയപ്പെടുത്തിയാണ് തൃശൂര്‍ ഫൈനല്‍ ടിക്കറ്റെടുത്തത്.
ഗോള്‍ രഹിതമായി നിന്ന ആദ്യ പകുതിക്ക് ശേഷം രണ്ടാം പകുതിയിലാണ് തൃശൂരിന്റെ നാലു ഗോളും വീണത്. തൃശൂരിനായി റോഷന്‍ ഇരട്ട ഗോള്‍ നേടിയപ്പോള്‍ ബാബന്‍ സിവറി ഗിരീഷും അര്‍ജുന്‍ കലാധരനും ഓരോ ഗോള്‍ വീതം അക്കൗണ്ടിലാക്കി. ഇന്ന് വൈകിട്ട് 3.30നാണ് ഫൈനല്‍ മത്സരം. മൂന്നും നാലും സ്ഥാനക്കാര്‍ക്കായുള്ള മത്സരം ഇന്ന് രാവിലെ 7.30ന് നടക്കും.