പാട്യാല: ഫെഡറേഷന്‍ കപ്പ് ദേശീയ സീനിയര്‍ അത്‌ലറ്റിക്‌സ് ചാംപ്യന്‍ഷിപ്പിന്റെ രണ്ടാം ദിനത്തില്‍ കേരളത്തിന് നിരാശ. രണ്ട് വെള്ളി മെഡല്‍ മാത്രമാണ് കേരളത്തിന് രണ്ടാം ദിനം ലഭിച്ചത്. വനിതകളുടെ ലോങ് ജംപിലും പുരുഷന്‍മാരുടെ 800 മീറ്ററിലുമാണ് കേരളം രണ്ടാം ദിനത്തില്‍ രണ്ട് വെള്ളി മെഡലുകള്‍ നേടിയത്. ലോങ് ജംപില്‍ നീനയും 800 മീറ്ററില്‍ ജിന്‍സന്‍ ജോണ്‍സനുമാണ് കേരളത്തിന് മെഡല്‍ സമ്മാനിച്ചത്.
വനിതകളുടെ ലോങ് ജംപില്‍ കേരളത്തിന്റെ നീന വി 6.31 മീറ്റര്‍ താണ്ടിയാണ് വെള്ളി സ്വന്തമാക്കിയത്. 6.55മീറ്റര്‍ പിന്നിട്ട് ആന്ധ്ര പ്രദേശിനായി മത്സരിച്ച മലയാളി താരം നയന ജെയിംസ് സ്വര്‍ണം സ്വന്തമാക്കി. തമിഴ്‌നാടിന്റെ കാര്‍ത്തികയ്ക്കാണ് വെങ്കലം. കേരളത്തിന്റെ വിനി പി.വി എട്ടാം സ്ഥാനം കൊണ്ട് തൃപ്തിപ്പെട്ടു.
പുരുഷന്‍മാരുടെ 800 മീറ്ററില്‍ 1.50.83 സെക്കന്‍ഡില്‍ ഫിനിഷ് ചെയ്താണ് ജിന്‍സന്‍ രണ്ടാം സ്ഥാനത്തെത്തിയത്. 1.50.54 സെക്കന്‍ഡില്‍ ഫിനിഷ് ചെയ്ത് ഡല്‍ഹിയുടെ മലയാളി താരം അമോജ് ജേക്കബ് സ്വര്‍ണം സ്വന്തമാക്കി. കര്‍ണാടകയുടെ വിശ്വംഭര്‍ കോല്‍കറിനാണ് വെങ്കലം. ഈയിനത്തില്‍ ഇറങ്ങിയ കേരളത്തിന്റെ മറ്റൊരു താരം സജീഷ് ജോസഫ് എട്ടാം സ്ഥാനത്താണ് മത്സരം പൂര്‍ത്തിയാക്കിയത്.
അതേസമയം കേരളം ഏറെ പ്രതീക്ഷയോടെ ഉറ്റുനോക്കിയ വനിതകളുടെ 800 മീറ്ററില്‍ പാടെ നിരാശയായിരുന്നു ഫലം. കേരളത്തിനായി മത്സരിച്ച മൂന്ന് താരങ്ങളില്‍ ഒരാള്‍ക്കും മെഡല്‍ നേടാന്‍ സാധിച്ചില്ല. ഏറെ പ്രതീക്ഷയുണ്ടായിരുന്ന ഒളിംപ്യന്‍ ടിന്റു ലൂക്ക എഴാം സ്ഥാനം കൊണ്ട് തൃപ്തിപ്പെട്ടു. മറ്റു താരങ്ങളായ തെരേസ ജോസഫ് നാലാമതും അബിത മേരി മാനുവല്‍ അഞ്ചാമതുമാണ് എത്തിയത്. ഈയിനത്തില്‍ മഹാരാഷ്ട്രയുടെ അര്‍ച്ചന അഥവ് സ്വര്‍ണം സ്വന്തമാക്കി. പുരുഷന്‍മാരുടെ ലോങ് ജംപിലും കേരളത്തിന് മെഡലൊന്നും ലഭിച്ചില്ല. കേരളത്തിന്റെ മുഹമ്മദ് അനീസ് നാലാമതും ജിനേഷ് ഏഴാമതും ജിതിന്‍ തോമസ് പത്താം സ്ഥാനത്തുമാണ് എത്തിയത്.