ന്യൂഡല്‍ഹി: ആശുപത്രിയില്‍ മന്ത്രിസഭാ യോഗം വിളിച്ച് ഗോവ മുഖ്യമന്ത്രി മനോഹര്‍ പരീക്കര്‍. താന്‍ ചികിത്സയില്‍ കഴിയുന്ന ആള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സില്‍ (എയിംസ്) എത്താനാണ് പരീക്കര്‍ മന്ത്രിമാരോട് ആവശ്യപ്പെട്ടത്. സെപ്റ്റംബര്‍ 15ന് പരീക്കറെ എയിംസില്‍ ചികിത്സയില്‍ പ്രവേശിപ്പിച്ചതിന് ശേഷം ആദ്യമായാണ് ഔദ്യോഗികമായി മന്ത്രിസഭാ യോഗം ചേര്‍ന്നത്.
മന്ത്രിമാര്‍ക്ക് പുറമെ സഖ്യകക്ഷികളായ മഹാരാഷ്ട്രവാദി ഗോമന്തക് പാര്‍ട്ടി (എം.ജി.പി), ഗോവ ഫോര്‍വേഡ് പാര്‍ട്ടി (ജി.എഫ്.പി) എന്നിവരെയും ഇന്നലെ നടന്ന യോഗത്തിലേക്ക് ക്ഷണിച്ചിരുന്നു. മുഖ്യമന്ത്രി ചികിത്സയിലായിരുന്നതിനാല്‍ സംസ്ഥാനത്തെ ഭരണം പ്രതിസന്ധിയിലാണെന്ന് പ്രതിപക്ഷമായ കോണ്‍ഗ്രസ് ആരോപിച്ചിരുന്നു.
കൂടാതെ അവിശ്വാസ പ്രമേയം അവതരിപ്പിക്കാന്‍ അനുമതി തേടി 16 കോണ്‍ഗ്രസ് നിയമസഭാ സാമാജികര്‍ ഗവര്‍ണര്‍ മൃദുല സിന്‍ഹയെ കണ്ടിരുന്നു. 40 അംഗ നിയമസഭയില്‍ ബി.ജെ.പിക്ക് മാത്രമായി 14 പ്രതിനിധികളാണുള്ളത്.
2017ലെ തെരഞ്ഞെടുപ്പില്‍ ഏറ്റവും വലിയ ഒറ്റ കക്ഷിയായിരുന്ന കോണ്‍ഗ്രസിന് സര്‍ക്കാര്‍ രൂപവല്‍കരിക്കാന്‍ കഴിയാതെ വന്നപ്പോള്‍ ഗോവ ഫോര്‍വേഡ് പാര്‍ട്ടി, മഹാരാഷ്ട്രവാദി ഗോമന്തക്, മൂന്നു സ്വതന്ത്രര്‍ എന്നിവരെ ഒപ്പം ചേര്‍ത്ത് ബി.ജെ.പി സര്‍ക്കാര്‍ രൂപീകരിക്കുകയായിരുന്നു.