കൊണ്ടോട്ടി: കരിപ്പൂരില്‍ വലിയ വിമാനങ്ങള്‍ ഇറങ്ങുന്നതിന്റെ മുന്നോടിയായി ഡയരക്ടര്‍ ജനറല്‍ ഓഫ് സിവില്‍ ഏവിയേഷന്റെ (ഡി.ജി.സി.എ) നിര്‍ദേശത്തില്‍ കാലിബറേഷന്‍ പരിശോധന പൂര്‍ത്തിയാക്കി. ദില്ലി വിമാന പരിശോധനാ യൂനിറ്റ് സാങ്കേതിക വിദഗ്ധരാണ് കരിപ്പൂര്‍ വിമാനത്താവളത്തിലെ കമ്യൂണിക്കേഷന്‍, നാവിഗേഷന്‍ സര്‍വെയ്‌ലന്‍സ് വിഭാഗത്തിലെ ഉദ്യോഗസ്ഥരുടെ സഹായത്തോടെയാണ് രണ്ട് ഇന്‍സ്ട്രുമെന്റല്‍ ലാന്‍ഡിങ് സിസ്റ്റവും കാലിബറേഷന്‍ നടത്തിയത്. സാധാരണ ആറ് മാസത്തിലൊരിക്കലാണ് കാലിബറേഷന്‍ വിമാനങ്ങള്‍ പരിശോധനക്കെത്താറുള്ളത്. എന്നാല്‍ പരിശോധനാ സമയം ആകുന്നതിനു മുന്‍പുതന്നെ കരിപ്പൂരില്‍ വലിയ വിമാനങ്ങള്‍ക്ക് അനുമതി നല്‍കിയതോടെ സുരക്ഷാ പരിശോധന നടത്തുകയായിരുന്നു.
കിഴക്കു ഭാഗത്തും പടിഞ്ഞാറു ഭാഗത്തുമാണ് കരിപ്പൂരില്‍ രണ്ടു ഐ.എല്‍.എസ് സ്ഥാപിച്ചിട്ടുളളത്. ഇവയുടെ പ്രധാന ഭാഗങ്ങളായ ഗ്ലേ-പാത്ത്, ലോക്കലൈസര്‍ എന്നിവയാണ് കാലിബറേഷന്‍ പരിശോധനക്ക് വിധേയമാക്കിയത്. ജോ.ജനറല്‍ മാനേജര്‍ മദന്‍ലാലിന്റെ നേതൃത്വത്തിലുള്ള മൂന്നംഗ സംഘമാണ് കാലിബറേഷന് നേതൃത്വം നല്‍കിയത്. മുനീര്‍ മാടമ്പാട്ട്, എം.പി ഹൈദ്രു, ടി.എന്‍ രാജു, ഷാജി ജെയിംസ്, ജുനൈസ്, കെ.പി.എം മുസ്തഫ, എന്‍. നന്ദകുമാര്‍ എന്നിവര്‍ വിവിധ ഉപകരണങ്ങളുടെ നേതൃത്വം ഏറ്റെടുത്തു.
കരിപ്പൂരില്‍ സഊദി എയര്‍ലൈന്‍സ് വലിയ വിമാന സര്‍വിസിന് മുന്നൊരുക്കങ്ങള്‍ നടത്തിവരികയാണ്. എയര്‍ഇന്ത്യ ജെമ്പോ വിമാന സര്‍വിസിനായി 15ന് പരിശോധനയും നടത്തുന്നുണ്ട്. ഇതിന് മുന്നോടിയായാണ് വിമാന സുരക്ഷിത ലാന്‍ഡിങ് ഉറപ്പുവരുത്താന്‍ കാലിബറേഷന്‍ പരിശോധനക്കെത്തിയത്.