കൊണ്ടോട്ടി:  ഉപരാഷ്ട്രപതിയുടെ പേരില്‍ അനുവദിച്ച ഹജ്ജ് ക്വാട്ടയില്‍ കേരളത്തില്‍നിന്ന് ആര്‍ക്കും അവസരമില്ല. വൈസ് പ്രസിഡന്റ് ക്വാട്ടയിലെ 75 സീറ്റില്‍ 26 എണ്ണമാണ് വീതം വച്ചത്. ഇതില്‍ പത്തെണ്ണവും ഉത്തര്‍ പ്രദേശിനാണ് ലഭിച്ചത്. ജമ്മു കശ്മിരിന് അഞ്ചും ഗുജറാത്തിന് നാലും ഡല്‍ഹിക്ക് മൂന്നും സീറ്റു ലഭിച്ചു. മധ്യപ്രദേശ്, മഹാരാഷ്ട്ര എന്നിവക്ക് രണ്ട് വീതം സീറ്റും ലഭിച്ചു.
രാഷ്ട്രപതി, ഉപരാഷ്ട്രപതി, പ്രധാനമന്ത്രി, കേന്ദ്ര വിദേശകാര്യ മന്ത്രി തുടങ്ങിയവര്‍ക്ക് ഹജ്ജ് ക്വാട്ടകളുണ്ട്. ഇവയില്‍ ഒരു ഭാഗം സംസ്ഥാനങ്ങള്‍ക്ക് വീതംവെക്കുകയാണ് ചെയ്യുന്നത്. ഇന്ത്യയില്‍ ഏറ്റവും കൂടുതല്‍ ഹജ്ജ് അപേക്ഷകള്‍ ലഭിച്ച  കേരളത്തിന് സീറ്റു നല്‍കാതെയാണ് അപേക്ഷകരില്‍ യഥാക്രം രണ്ടു മൂന്നും സ്ഥാനത്തുള്ള ഗുജറാത്ത്, ഉത്തര്‍പ്രദേശ് സംസ്ഥാനങ്ങള്‍ക്ക് ക്വാട്ട നല്‍കിയത്. കേരളത്തിന് ഇതുവരെയായി 11197 പേര്‍ക്കാണ് അവസരം ലഭിച്ചത്. 84039 പേര്‍ കാത്തിരിപ്പു പട്ടികയിലാണ്.