പത്തനംതിട്ട: റാന്നിയില്‍ ഭക്ഷണത്തിന് ചൂടില്ലെന്ന് പറഞ്ഞതിന് ക്രൂരമായ വിമുക്ത ഭടന്‍ മര്‍ദനത്തിനിരയായ സംഭവത്തില്‍ ആറു പേര്‍ കസ്റ്റഡിയില്‍. റാന്നി പൊതമണ്‍ സ്വദേശി ശിവകുമാറിനാണ് കഴിഞ്ഞദിവസം നടുറോഡില്‍ മര്‍ദ്ദനമേറ്റത്.

ഭക്ഷണത്തിന് ചൂടില്ലെന്ന് പറഞ്ഞ് ആദ്യം തര്‍ക്കത്തിലേര്‍പ്പെട്ടത് ശിവകുമാറാണ്. ഹോട്ടലില്‍ കഴിക്കാനെത്തിയ മറ്റൊരാളെ മര്‍ദിക്കുകയും ചെയ്തു. ഇതേത്തുടര്‍ന്നാണ് ഹോട്ടല്‍ ഉടമയും ജീവനക്കാരും ചേര്‍ന്ന് ശിവകുമാറിനെ റോഡിലിട്ട് മര്‍ദിച്ചത്. ഇതിന്റെ ദൃശ്യം സമൂഹമാധ്യമങ്ങളില്‍ പ്രചരിച്ചിരുന്നു.

ഇരുകൂട്ടരുടെയും പരാതിയില്‍ പൊലിസ് കേസെടുത്തിട്ടുണ്ട്. ശിവകുമാറിനെ മര്‍ദിച്ചതുമായി ബന്ധപ്പെട്ട് ഹോട്ടല്‍ ഉടമയും ജീവനക്കാരുമടക്കം ആറ് പേരെ പൊലിസ് കസ്റ്റഡിയിലെടുത്തിട്ടുണ്ട്. ഇവരുടെ അറസ്റ്റ് ഉടന്‍ രേഖപ്പെടുത്തുമെന്ന് റാന്നി പൊലിസ് അറിയിച്ചു. ശിവകുമാര്‍ കോഴഞ്ചേരിയിലെ സ്വകാര്യ ആശുപത്രിയിലും ജിജോമോന്‍ റാന്നി താലൂക്ക് ആശുപത്രിയിലും ചികിത്സയിലാണ്.