കിഴിശ്ശേരി : കിഴിശ്ശേരിയില്‍ തെരുവ് നായ്ക്കളുടെ ആക്രമണത്തിന് പിറകെ കുറുക്കന്മാരുടെ ശല്യവും രൂക്ഷമായി. കിഴിശ്ശേരി പുളിയക്കോട് മേല്‍മുറിയില്‍ ഗര്‍ഭിണിയായ സ്ത്രീ ഉള്‍പ്പെടെ ആറ് പേരെയാണ് കുറുക്കന്‍ ആക്രമിച്ചത്. മുഹമ്മദാജിയുടെ ഭാര്യ മുതീരീച്ചാലില്‍ ആമിനക്കുട്ടി (65), നടുതൊടിയില്‍ പാത്തുമ്മ (85), കോലാര്‍ വീട്ടില്‍ സുഹൈലത്ത് (22), കോട്ട അബ്ബാസിന്റെ മകള്‍ തസ്‌രിഫ (18) എന്നിവരാണ് കുറുക്കന്റെ ആക്രമണത്തിന് ഇരയായത്.
ഇന്നലെ രാവിലെ 12ഓടെയാണ് സംഭവം. ആളുകളെ ആക്രമിച്ചതിനു ശേഷം കുറുക്കന്‍പ്രദേശത്തെ ആടുകളെയും കടിച്ച് പരുക്കേല്‍പ്പിച്ചു. അക്രമത്തില്‍ പരുക്കേറ്റവര്‍ മഞ്ചേരി മെഡിക്കല്‍ കോളജ് ആശുപത്രിയില്‍ ചികിത്സ തേടി.തെരുവ് നായ്ക്കളെ ഭയന്ന് മുതിര്‍ന്നവര്‍ പോലും വീടിന് പുറത്തിറങ്ങാന്‍ കഴിയാത്ത അവസ്ഥയിലാണ്. സ്‌കൂളിലും മദ്‌റസയിലും പോകുന്ന കുട്ടികള്‍ വീട്ടിലേക്ക് തിരിച്ചു വരുന്നതുവരെ പ്രദേശത്ത രക്ഷിതാക്കള്‍ ആധിയിലാണ്.