കൊണ്ടോട്ടി: ജില്ലയില്‍ എട്ടു മാസത്തിനിടെ രജിസ്റ്റര്‍ ചെയ്തതു കുട്ടികള്‍ക്കെതിരേയുള്ള 234 ലൈംഗികാതിക്രമ പോക്‌സോ കേസുകള്‍. കഴിഞ്ഞ വര്‍ഷം ആകെ 219 കേസുകളാണ് ജില്ലയില്‍ രജിസ്റ്റര്‍ ചെയ്തിരുന്നത്. പൊലിസിന്റെ ഔദ്യോഗിക കണക്കുകള്‍ പ്രകാരം ഇത്തരം കേസുകളില്‍ സംസ്ഥാനത്തു തിരുവനന്തപുരം ജില്ലയ്ക്കു പിറകില്‍ രണ്ടാം സ്ഥാനത്താണ് മലപ്പുറം.
കഴിഞ്ഞ ജനുവരിയില്‍ 25 പോക്‌സോ കേസുകളാണ് ജില്ലയില്‍ രജിസ്റ്റര്‍ ചെയ്തത്. ഫെബ്രുവരിയില്‍ ഇത് 21 ആയെങ്കിലും മാര്‍ച്ചില്‍ 29 ആയി വര്‍ധിച്ചു. ഏപ്രിലില്‍ 23 കേസുകളും മെയ് മാസത്തില്‍ 33 കേസുകളുമുണ്ടായി. ജൂണില്‍ 28, ജൂലൈയില്‍ 43, ഓഗസ്റ്റില്‍ 32 എന്നിങ്ങനെയും കേസുകള്‍ രജിസ്റ്റര്‍ ചെയ്തു.
കുട്ടികള്‍ക്കെതിരേയുള്ള ലൈംഗികാതിക്രമം തടയുന്നതിന്റെ ഭാഗമായി 2012ലാണ് പോക്‌സോ നിലവില്‍ വന്നതെങ്കിലും കുട്ടികള്‍ സുരക്ഷിതരല്ലെന്നാണ് ബാലാവകാശ കമ്മിഷനും സംസ്ഥാന പൊലിസും നല്‍കുന്ന പുതിയ കണക്കുകള്‍ സൂചിപ്പിക്കുന്നത്. പോക്‌സോ കേസുകളില്‍ ഒരു വര്‍ഷത്തിനുള്ളില്‍ തീര്‍പ്പുകല്‍പിക്കണമെന്നാണ് നിയമമെങ്കിലും ഇതിനായി പ്രത്യേക കോടതികളില്ലാത്തതിനാല്‍ കേസുകള്‍ പരിഗണിക്കാനാകുന്നുമില്ല. സംസ്ഥാനത്തു തിരുവനന്തപുരം, എറണാകുളം, കോഴിക്കോട് എന്നിവിടങ്ങളില്‍ മാത്രമാണ് പോക്‌സോ കേസുകള്‍ക്കായി പ്രത്യേക കോടതികളുള്ളത്.
ഒന്നാംക്ലാസ് മജിസ്‌ട്രേറ്റ് കോടതിയോട് ചേര്‍ന്നാണ് കേസുകള്‍ പരിഗണിക്കുന്നത്. എല്ലാ ജില്ലകളിലും പോക്‌സോ പരിഗണിക്കാനായി മാത്രം പ്രത്യേക കോടതികള്‍ വേണമെന്ന ആവശ്യം ശക്തമാകുകയാണ്.