ആലുവ: വിവിധ ആവശ്യങ്ങള്‍ക്കായി സിവില്‍ സ്റ്റേഷനിലെത്തുന്നവരെ സ്വാഗതം ചെയ്യുന്നത് കവാടത്തിനു മുന്നിലെ 'മാലിന്യക്കൂമ്പാരം'. ചീഞ്ഞളിഞ്ഞ് ദുര്‍ഗന്ധം വമിക്കുന്ന മാലിന്യങ്ങള്‍ സിവില്‍ സ്റ്റേഷനിലെത്തുവര്‍ക്കു ദുരിതമാവുകയാണ്.
പ്രധാനമായും പ്ലാസ്റ്റിക്, ഭക്ഷണപദാര്‍ഥ മാലിന്യങ്ങളാണ് ഇവിടെ തള്ളിയിരിക്കുന്നത്.
സിവില്‍ സ്റ്റേഷനിലെ ജീവനക്കാരാണ് ഇത്തരം മാലിന്യങ്ങള്‍ ഇവിടെ ഇടുന്നതെന്നും ആക്ഷേപമുണ്ട്. എന്നാല്‍  പുറത്ത് നിന്നുള്ളവരാണ് ഇവിടെ മാലിന്യങ്ങള്‍ തള്ളുന്നതെന്നാണ് ജീവനക്കാരുടെ പരാതി.  രാപ്പകല്‍ ഭേദമന്യേ ഇവിടെ തെരുവുനായ്ക്കളുടെ ശല്യവും രൂക്ഷമാണ്.
നിരവധി ഓഫിസുകള്‍ പ്രവര്‍ത്തിക്കുന്ന സിവില്‍ സ്റ്റേഷനില്‍ വിവിധ ആവശ്യങ്ങള്‍ക്കായെത്തുന്നവര്‍ക്ക് മാലിന്യ ദുര്‍ഗന്ധം മാത്രമല്ല തെരുവ്‌നായ്ക്കളുടെ ശല്യവും സഹിക്കേണ്ട ഗതികേടാണ്.