തിരുവനന്തപുരം: തിരുവനന്തപുരം മുതല്‍ കാസര്‍കോട് വരെയുള്ള സെമി ഹൈസ്പീഡ് റെയില്‍ സര്‍വിസിനായി സിസ്ട്ര സമര്‍പ്പിച്ച സാധ്യതാ പഠന റിപ്പോര്‍ട്ടിനും അലൈന്‍മെന്റിനും ഇന്നലെ ചേര്‍ന്ന മന്ത്രിസഭാ യോഗം അംഗീകാരം നല്‍കി.
530 കി.മീ ദൂരത്തില്‍ സെമി ഹൈസ്പീഡ് ട്രെയിനുകള്‍ക്കായി നിലവിലുള്ള ഇരട്ടപ്പാതയ്ക്ക് പുറമെ മൂന്നും നാലും പാതയെന്നത് സംസ്ഥാനത്തിന്റെ മുന്‍ഗണനാ പട്ടികയിലുള്ള പദ്ധതിയാണ്.

മണിക്കൂറില്‍ ശരാശി 180 മുതല്‍ 200 കി.മീ വരെ വേഗത്തില്‍ ട്രെയിനുകള്‍ക്ക് സഞ്ചരിക്കുന്നതിനായി പുതിയ രണ്ടുപാതകള്‍ നിര്‍മിക്കാനാണ് സര്‍ക്കാര്‍ ഉദ്ദേശിക്കുന്നത്. തിരുവനന്തപുരത്ത് നിന്ന് ഒന്നര മണിക്കൂറിനുള്ളില്‍ എറണാകുളത്തും നാലുമണിക്കൂറിനുള്ളില്‍ കാസര്‍കോട്ടും എത്താന്‍ കഴിയും. പദ്ധതിക്ക് റെയില്‍വേ ബോര്‍ഡിന്റെ അംഗീകാരം ലഭിച്ചാല്‍ അഞ്ച് വര്‍ഷത്തിനകം നടപ്പാക്കാനാണ് തീരുമാനം.

കാസര്‍കോടിനും തിരൂരിനുമിടയില്‍ (220 കി.മീ) നിലവിലുള്ള പാതയ്ക്ക് സമാന്തരമായാണ് പുതിയ പാതകള്‍ നിര്‍മിക്കുക.
തിരൂര്‍ മുതല്‍ തിരുവനന്തപുരം വരെ (310 കി.മീ) നിലവിലുള്ള പാതയില്‍ നിന്ന് മാറിയാണ് പുതിയ പാതകള്‍ വരുന്നത്. ജനവാസം കുറഞ്ഞ മേഖലകളിലാണ് ഈ ഭാഗത്ത് പാതകള്‍ നിര്‍മിക്കുക.