ജിദ്ദ: ഉംറ സീസണ്‍ ആരംഭിച്ചതോടെ ഈ വര്‍ഷം ഇതുവരെ വിദേശങ്ങളില്‍നിന്ന് 57,12,372 തീര്‍ഥാടകര്‍ മക്കയിലെത്തിയതായി ജവാസാത്ത് ഡയറക്ടറേറ്റ്. മുഹര്‍റം ഒന്നിനും റമദാന്‍ മൂന്നിനുമിടയിലാണ് ഇത്രയും തീര്‍ഥാടകര്‍ എത്തിയത്. 52,45,704 പേര്‍ ഉംറ നിര്‍വഹിച്ച് സ്വദേശങ്ങളിലേക്ക് തിരിച്ചുപോയി. എന്നാല്‍, കൃത്യ സമയത്ത് തിരിച്ചുപോകാത്ത തീര്‍ഥാടകര്‍ക്ക് അരലക്ഷം റിയാല്‍ വരെ പിഴയും ആറുമാസം വരെ തടവും ലഭിക്കുമെന്ന് ജവാസാത്ത് അസിസ്റ്റന്റ് ഡയറക്ടര്‍ ജനറല്‍. മേജര്‍ ജനറല്‍ ഖാലിദ് അല്‍ജുഅയ്ദ് അറിയിച്ചു. ശിക്ഷ പൂര്‍ത്തിയാക്കിയ ശേഷം ഇവരെ നാടുകടത്തും.
അനധികൃതമായി തങ്ങുന്ന ഉംറ തീര്‍ഥാടകര്‍ക്ക് ജോലിയോ അഭയമോ  മറ്റു സഹായങ്ങളോ ആരും നല്‍കരുതെന്നും നിയമലംഘകരെ സഹായിക്കുന്നവര്‍ക്കെതിരെ നടപടി സ്വീകരിക്കുമെന്നും അദ്ദേഹം അറിയിച്ചു.