തൃപ്രയാര്‍ : ദേശീയപാത 66 ആനവിഴുങ്ങി ബൈപാസ് വിരുദ്ധ സമരവുമായി ബന്ധപ്പെട്ടു 12 ദിവസമായി നിരാഹാരസമരം തുടരുന്ന സമരനേതാവിന്റെ ആരോഗ്യനില വഷളായി. ആനവിഴുങ്ങിയിലെ ദേശീയപാത ബൈപാസ് വിരുദ്ധസമിതി ചെയര്‍മാന്‍ കെ.എച്ച് മിഷോയുടെ ആരോഗ്യനില അത്യന്തം വഷളായി. പന്ത്രണ്ടു ദിവസമായി മിഷോ പ്രതിഷേധ സൂചകമായി അനിശ്ചിതകാല നിരാഹാര സമരത്തിലാണ്. വീടു നഷ്ടപ്പെടുന്ന കോളനി നിവാസികളുടെ എഴുപതു ദിവസമായി തുടരുന്ന സമരത്തെ പാടേ അവഗണിച്ച കലക്ടര്‍ അടക്കമുള്ള അധികാരികള്‍ മിഷോയുടെ കാര്യത്തില്‍ കാരുണ്യരഹിതവും നിരുത്തരവാദപരമായുമായ സമീപനമാണ് കൈക്കൊള്ളുന്നതെന്ന് സമരസമിതി ആരോപിച്ചു. മിഷോയുടെ ആരോഗ്യസ്ഥിതി വിലയിരുത്താനെത്തിയ വലപ്പാട് ഗവ. ആശുപത്രിയിലെ ഡോക്ടര്‍ രണ്ടു ദിവസം മുമ്പു നടത്തിയ പരിശോധനയില്‍ മിഷോയും സമരക്കാരും അതൃപ്തിയും അവിശ്വാസവും പ്രകടിപ്പിച്ചതിനാല്‍ പരിശോധന നടത്താതെ തിരിച്ചുപോയി. സമരസമിതി ശക്തമായി ആവശ്യപ്പെട്ടതിനെ തുടര്‍ന്ന് പിന്നീട് പൊലീസ് അകമ്പടിയോടെ മെഡിക്കല്‍ സൂപ്രണ്ട് ഫാത്തിമ അടക്കമുള്ള മെഡിക്കല്‍ സംഘം എത്തി ആരോഗ്യനില വിലയിരുത്തി. ഇ.സി ജിയില്‍ വേരിയേഷനും ബ്ലഡ് ഷുഗറിലും ഓക്‌സിജന്‍ ലെവലിലും കാര്യമായ കുറവും പനി, യൂറിനല്‍ ഇന്‍ഫെക്ഷന്‍ തുടങ്ങിയ ആരോഗ്യപ്രശ്‌നങ്ങളുമുണ്ടെന്നു സൂചിപ്പിച്ചു. മിഷോയെ ആശുപത്രിയിലേക്കു നീക്കുവാനുള്ള പോലീസിന്റെ നീക്കം സ്ത്രീകള്‍ അടക്കമുള്ള നൂറുകണക്കിന് സമരക്കാരുടെയും നാട്ടുകാരുടേയും വന്‍ പ്രതിഷേധത്തെ തുടര്‍ന്ന് ഉപേക്ഷിച്ചു. ഇനി എന്തു സംഭവിച്ചാലും ഉത്തരവാദികള്‍ സമരക്കാരായിരിക്കുമെന്ന് എസ്.ഐ അനൂപ് പി.ജി പറഞ്ഞു. എന്നാല്‍ ഉത്തരവാദിത്തം കലക്ടര്‍ അടക്കമുള്ള അധികാരികള്‍ക്കാണെന്ന് സമരസമിതി തിരിച്ചടിച്ചു. മിഷോയുടെ ജീവന്‍ വച്ചു പന്താടരുതെന്ന് സമരസമിതി അധികാരികള്‍ക്ക് മുന്നറിയിപ്പ് നല്‍കി. കലക്ടര്‍ ഉടനടി സമരപ്പന്തലും കോളനിയും സന്ദര്‍ശിച്ച് നടപടികള്‍ സ്വീകരിക്കാതെ സമരം അവസാനിപ്പിക്കില്ലെന്ന ഉറച്ച നിലപാടിലാണ് മിഷോയും സമരസമിതിയും.