കൊച്ചി: ജൂണ്‍ 17ന് ഉദ്ഘാടനത്തിനൊരുങ്ങുന്ന സംസ്ഥാനത്തിന്റെ അഭിമാന പദ്ധതിയായ കൊച്ചി മെട്രോയില്‍ കന്നിയാത്ര ചെയ്ത ആവേശത്തില്‍ മുഖ്യമന്ത്രി പിണറായി വിജയന്‍. ഇന്ന് രാവിലെ പാലാരിവട്ടത്തു നിന്നും ആലുവ സ്റ്റേഷന്‍ വരെയാണ് മെട്രോയുടെ ചുമതലയുള്ള മുഖ്യമന്ത്രി യാത്ര ചെയ്തത്.

കെ.എം.ആര്‍.എല്‍ എം.ഡി ഏലിയാസ് ജോര്‍ജ്,സി.പി.എം എറണാകുളം ജില്ലാ സെക്രട്ടറി പി രാജീവ്,മറ്റു ജനപ്രതിനിധികള്‍ എന്നിവര്‍ക്കൊപ്പമായിരുന്നു യാത്ര.

പ്രധാനമന്ത്രി ഉദ്ഘാടന ചടങ്ങിനെത്തുന്നതിനു മുന്‍പ് മെട്രോയുടെ പുരോഗതി വിലയിരുത്താനും സോളാര്‍ പദ്ധതി ഉദ്ഘാടനത്തിനുമായിരുന്നു പിണറായി എത്തിയത്. എന്നാല്‍, സോളാര്‍ ഉദ്ഘാടനം വിവാദങ്ങള്‍ മൂലം റദ്ദാക്കിയ നിരാശ അദ്ദേഹത്തിനുണ്ടായിരുന്നെങ്കിലും കന്നിയാത്രയുടെ സംതൃപ്തിയിലാണ് അദ്ദേഹം ഇവിടെ നിന്നും മടങ്ങിയത്.