ഇന്ത്യ - വെസ്റ്റ് ഇന്‍ഡീസ് ഏകദിനത്തിന് ഇന്ന് തുടക്കം

ഗയാന: ടി20 പരമ്പര സ്വന്തമാക്കി വിന്‍ഡീസ് പരമ്പരയില്‍ മികച്ച തുടക്കവുമായി തിളങ്ങിയ ഇന്ത്യ ഇന്ന് വീണ്ടും ഇറങ്ങുന്നു. വിന്‍ഡീസിനെതിരേയുള്ള ഏകദിന പരമ്പരയിലെ ആദ്യത്തെ മത്സരത്തിലാണ് ഇന്ത്യ ആതിഥേയരായ വിന്‍ഡീസിനെ നേരിടുന്നത്.
ടി20 പരമ്പര സ്വന്തമാക്കിയത് പോലെ ഏകദിന പരമ്പരയും തൂത്ത് വാരാമെന്ന വിശ്വാസത്തിലാണ് ടീം ഇന്ത്യ. ഇന്ത്യന്‍ സമയം രാത്രി ഏഴു മണിക്കാണ് മല്‍സരം. മികച്ച നിരയുണ്ടായിട്ടും ടി20 യില്‍ നാണക്കേടിന്റെ തോല്‍വി ഏറ്റുവാങ്ങിയ വിന്‍ഡീസ് തിരച്ചടിക്കാനുള്ള ഒരുക്കത്തിലാണ്. എന്ത് വിലകൊടുത്തും ഏകദിന പരമ്പര സ്വന്തമാക്കണമെന്നാണ് വിന്‍ഡീസിന്റെ തീരുമാനം.
ടി20 പരമ്പരയില്‍ കളിച്ച ടീമില്‍ ചില മാറ്റങ്ങളുമായിട്ടാണ് ഇന്ത്യ ഏകദിനത്തില്‍ ഇറങ്ങുന്നത്. ടി20 സംഘത്തില്‍ ഇല്ലാതിരുന്ന കേദാര്‍ യാദവ്, യുസ്‌വേന്ദ്ര ചഹല്‍, മുഹമ്മദ് ഷമി, കുല്‍ദീപ് യാദവ് എന്നിവര്‍ ഏകദിന ടീമില്‍ മടങ്ങിയെത്തും. ഷമിയെക്കൂടാതെ ചഹല്‍, കുല്‍ദീപ് ഇവരിലൊരാള്‍ക്കു മാത്രമേ പ്ലെയിങ് ഇലവനില്‍ ഇടം ലഭിക്കാന്‍ സാധ്യതയുള്ളൂ. ദീര്‍ഘകാലമായി ഇന്ത്യക്കു തലവേദനയായി തുടരുന്ന നാലാം നമ്പറില്‍ ആരെ ഇറക്കുമെന്ന കാര്യത്തില്‍ ഇനിയും തീരുമാനമായിട്ടില്ല. ലോകേഷ് രാഹുലോ ശ്രേയസ് അയ്യരോ ആവും നാലാം നമ്പറില്‍ ഇറങ്ങുക.
ടി20 യില്‍ ഒരു മല്‍സരം പോലും കളിക്കാന്‍ അവസരം ലഭിക്കാതിരുന്ന ശ്രേയസിനെ ഏകദിനത്തില്‍ ഇന്ത്യ കളിപ്പിച്ചേക്കുമെന്നാണ് സൂചന. അഞ്ചാം നമ്പറിലും ഇന്ത്യക്ക് ആരെ കളിപ്പിക്കുമെന്ന ആശയക്കുഴപ്പമുണ്ട്. ലോകകപ്പില്‍ ദയനീയ പരാജയമായി മാറിയ കേദാര്‍ യാദവായിരുന്നു അഞ്ചാം നമ്പറില്‍ എത്തിയിരുന്നത്. എന്നാല്‍ നിലവിലെ സാഹചര്യത്തില്‍ കേദാറിനെ എന്ത് ചെയ്യുമെന്നറിയാതെ കുഴങ്ങുകയാണ് മാനേജ്‌മെന്റ്.
വിന്‍ഡീസിനെതിരായ ആദ്യ ഏകദിനത്തില്‍ യാദവിനു പകരം യുവ താരം മനീഷ് പാണ്ഡെയെ അഞ്ചാം നമ്പറില്‍ പരീക്ഷിക്കാന്‍ ഇന്ത്യ ആലോചിക്കുന്നു@ണ്ട്. കഴിഞ്ഞ വിന്‍ഡീസ് പര്യടനത്തില്‍ ഇന്ത്യ എയ്ക്കു വേ@ണ്ടി പാണ്ഡെ തിളങ്ങിയിരുന്നു. ടീമിന്റെ ക്യാപ്റ്റനും അദ്ദേഹമായിരുന്നു. വിന്‍ഡീസിന് വേണ്ടി ഏറെ കാലം വെടിക്കെട്ട് പ്രകടനം പുറത്തെടുത്ത വിന്‍ഡീസ് താരം ക്രിസ് ഗെയ്‌ലിന്റെ വിടവാങ്ങല്‍ പരമ്പര കൂടിയാണിത്. ഉജ്ജ്വല പ്രകടനം നടത്തി തലയുയര്‍ത്തി തന്നെ ക്രിക്കറ്റിനോട് ഗുഡ്‌ബൈ പറയാനാണ് ഗെയ്‌ലിന്റെ ശ്രമം. ഗെയ്‌ലിന്റെ അവസാന പരമ്പര എന്ത് വിലകൊടുത്തും സ്വന്തമാക്കുമെന്ന് വിന്‍ഡീസ് താരങ്ങള്‍ നേരത്തെ വ്യക്തമാക്കിയിരുന്നു.
കഴിഞ്ഞ ലോകകപ്പിനു ശേഷം വിരമിക്കുമെന്നായിരുന്നു നേരത്തേ ഗെയ്ല്‍ പ്രഖ്യാപിച്ചിരുന്നത്. എന്നാല്‍ ഇന്ത്യക്കെതിരേയുള്ള ഏകദിന പരമ്പരയില്‍ കൂടി കളിച്ചതിനുശേഷമേ വിന്‍ഡീസ് കുപ്പായമഴിക്കൂ എന്ന് അദ്ദേഹം പിന്നീട് പറഞ്ഞിരുന്നു.