തളിപ്പറമ്പ്: യുവാവ് മരിക്കാനിടയായ വാഹനാപകടത്തെ തുടര്‍ന്ന് ഒളിവില്‍ കഴിയുകയായിരുന്ന കാര്‍ ഡ്രൈവറെ പൊലിസ് പിടികൂടി. കണ്ണൂര്‍ വിദ്യാഭ്യാസ ഡി.ഡി ഓഫിസ് ജീവനക്കാരനായ കുറ്റിക്കോല്‍ കുറുക്കന്‍ മൊട്ടയിലെ ദിനേശ് ബാബുവിനെയാണ് (40) തളിപ്പറമ്പ് പൊലിസ് അറസ്റ്റ് ചെയ്തത്.
തളിപ്പറമ്പ് ഞാറ്റുവയലിലെ കൊങ്ങായീന്റവിട മുസമ്മില്‍ (22) സഞ്ചരിച്ച ബൈക്കില്‍ ഇയാളുടെ കാര്‍ ഇടിക്കുകയായിരുന്നു. തുടര്‍ന്ന് കാര്‍ നിര്‍ത്താതെ ഇയാള്‍ രക്ഷപ്പെട്ടു.
കഴിഞ്ഞ മൂന്നിന് രാത്രി 8.30 നായിരുന്നു സംഭവം. മുസമ്മില്‍ മംഗളൂരുവിലെ സ്വകാര്യ ആശുപത്രിയില്‍വച്ചാണ് മരിച്ചത്.
ബക്കളം സ്‌നേഹ ഇന്‍ ബാറില്‍നിന്ന് കാറുമായി പുറത്തേക്കിറങ്ങവെയാണ് ധര്‍മശാല ഭാഗത്തുനിന്ന് തളിപ്പറമ്പിലേക്ക് വരികയായിരുന്ന മുസമ്മില്‍ യാത്ര ചെയ്തിരുന്ന ബൈക്കില്‍ ഇടിച്ചത്. അപകടത്തെ തുടര്‍ന്ന് കാറുമായി രക്ഷപ്പെട്ട ദിനേശ് ബാബു പ്ലാത്തോട്ടത്തെ ഒരു വീട്ടുമുറ്റത്ത് കാര്‍ പാര്‍ക്ക് ചെയ്ത് ഒളിവില്‍ പോവുകയായിരുന്നു. തളിപ്പറമ്പ് അഡീ. എസ്.ഐ കെ.കെ പ്രശോഭിന്റെ നേതൃത്വത്തില്‍ നടത്തിയ അന്വേഷണത്തില്‍ കാര്‍ കസ്റ്റഡിയിലെടുത്തിരുന്നു. വിദ്യാഭ്യാസ സി.ഡി ഓഫിസിലെ സീനിയര്‍ ക്ലര്‍ക്കാണ് ദിനേശ് ബാബു.