കൊല്ലം: മുന്നോക്ക വികസന കോര്‍പറേഷന്‍ ചെയര്‍മാനു നല്‍കിയതുപോലെ ന്യൂനപക്ഷ വികസന ധനകാര്യ കോര്‍പറേഷന്‍ ചെയര്‍മാനും കാബിനറ്റ് പദവി നല്‍കണമെന്ന് നാഷനല്‍ മുസ്‌ലിം കൗണ്‍സില്‍ സംസ്ഥാന പ്രസിഡന്റ് എ. റഹിംകുട്ടി വാര്‍ത്താസമ്മേളനത്തില്‍ പറഞ്ഞു.
പിന്നോക്ക, പട്ടികജാതി-വര്‍ഗ വികസന കോര്‍പറേഷന്‍ ചെയര്‍മാന്‍മാരും കാബിനറ്റ് പദവിക്ക് അര്‍ഹരാണ്. യു.ഡി.എഫ് സര്‍ക്കാരിന്റെ കാലത്ത് മുസ്‌ലിം മന്ത്രിമാര്‍ ആറുപേരായപ്പോള്‍ സാമൂഹ്യനീതി തകരുമെന്ന് പറഞ്ഞവര്‍ ഇപ്പോള്‍ രണ്ടുമന്ത്രിമാര്‍ മാത്രമായപ്പോള്‍ സാമൂഹിക നീതിയെപ്പറ്റി ഉരിയാടുന്നില്ല.
27ശതമാനംവരുന്ന മുസ്‌ലിംങ്ങള്‍ക്ക് അഞ്ചുമന്ത്രിസ്ഥാനം ലഭിക്കേണ്ടതുണ്ട്. ഹാദിയ വിഷയത്തില്‍ ഹൈക്കോടതി വിധി പക്ഷപാതപരമാണ്. മുത്തലാഖ് വിഷയത്തില്‍ മുസ്‌ലിം വ്യക്തിനിയമ ബോര്‍ഡ് സുപ്രിംകോടതിയില്‍ സ്വീകരിച്ച നിലപാട് കാലഘട്ടത്തിന് അനുസൃതമാണ്. ഇറച്ചി-തുകല്‍ വ്യാപാരികളെ തകര്‍ത്ത് കോര്‍പറേറ്റുകളും വന്‍കിട മാംസ കയറ്റുമതി വ്യാപാരികളുമായ ബി.ജെ.പി അനുകൂല കുത്തകകളെ സഹായിക്കുന്നതിന് ലക്ഷ്യമിട്ടാണ് കേന്ദ്രം കാശപ്പ് നിരോധനത്തിന് വിജ്ഞാപനമിറക്കിയത്. പാലൊളി റിപ്പോര്‍ട്ടില്‍ പറഞ്ഞിട്ടുള്ള സുപ്രധാന കാര്യങ്ങള്‍ നടപ്പാക്കാന്‍ സര്‍ക്കാരിന് കഴിഞ്ഞിട്ടില്ല. സര്‍ക്കാര്‍ ഒരു വര്‍ഷം പിന്നിട്ടിട്ടും പാലൊളി റിപ്പോര്‍ട്ട് നടപ്പാക്കുന്നില്ലെന്നും അറബിക് സര്‍വകലാശാല മുസ്‌ലിം സമുദയത്തിന്റെ ദീര്‍ഘകാലമായുള്ള ആവശ്യമാണെന്നും റഹിംകുട്ടി പറഞ്ഞു. വാര്‍ത്താസമ്മേളനത്തില്‍ പുരക്കുന്നില്‍ അഷ്‌റഫ്, വൈ. അഷ്‌റഫ് സഫ, കുരീപ്പുഴ ഷാനവാസ്, നെടുമ്പന ജാഫര്‍ എന്നിവരും പങ്കെടുത്തു.