തിരുവനന്തപുരം: കുട്ടിക്കടത്തിനെ പ്രതിരോധിക്കുന്നതിന്റെ ഭാഗമായി കോളജ് വിദ്യാര്‍ഥി-പൊലിസ് പിന്തുണയോടെ എല്ലാ ജില്ലകളിലും ആന്റി ഹ്യൂമന്‍ ട്രാഫിക്കിങ് ക്ലബുകള്‍ രൂപീകരിക്കുമെന്ന് മന്ത്രി കെ.കെ ശൈലജ. ശരണബാല്യം പദ്ധതിയുടെ രണ്ടാംഘട്ടം ആരംഭിച്ചതായും മന്ത്രി പറഞ്ഞു.
ഈ സാമ്പത്തിക വര്‍ഷത്തെ പദ്ധതി പ്രവര്‍ത്തനങ്ങള്‍ക്കായി 95.87 ലക്ഷം രൂപ അനുവദിച്ചിട്ടുണ്ട്. ജില്ലാ ശിശു സംരക്ഷണ യൂനിറ്റുകള്‍ വഴി നടപ്പിലാക്കുന്ന ശരണബാല്യം പദ്ധതി പ്രവര്‍ത്തനങ്ങള്‍ക്കായി ചൈല്‍ഡ് റെസ്‌ക്യൂ ഓഫിസര്‍മാരെ നിയമിച്ചു. പദ്ധതി പ്രവര്‍ത്തനങ്ങള്‍ക്കായി പ്രത്യേകമായി തയാറാക്കിയ സ്റ്റാന്റേര്‍ഡ് ഓപ്പറേറ്റിങ് നടപടിക്രമത്തിന് സര്‍ക്കാര്‍ അനുമതി നല്‍കിയിരുന്നു.

സംസ്ഥാനതലത്തില്‍ ശരണബാല്യം പദ്ധതി കാര്യക്ഷമമായി നടപ്പിലാക്കുന്നതിനായി എല്ലാ ജില്ലകളിലേയും ആര്‍.ഡി.ഒ, ചൈല്‍ഡ് പ്രൊട്ടക്ഷന്‍ ഓഫിസര്‍, ലേബര്‍ ഓഫിസര്‍, ഡി.വൈ.എസ്.പി, സി.ഡബ്ല്യു.സി. ചെയര്‍മാന്‍ തുടങ്ങിയവര്‍ക്ക് പ്രത്യേക പരിശീലനം നല്‍കും. ബാലവേല, ബാലഭിക്ഷാടനം ഉള്‍പ്പെടെ കുട്ടികള്‍ക്കെതിരായ അതിക്രമങ്ങള്‍ ശ്രദ്ധയില്‍പ്പെട്ടാല്‍ പൊതുജനങ്ങള്‍ക്ക് ബന്ധപ്പെട്ട അധികാരികളെ അറിയിക്കുന്നതിനായി പ്രത്യേക മൊബൈല്‍ ആപ്ലിക്കേഷന്‍ രൂപകല്‍പന ചെയ്യും.

സ്‌കൂളില്‍ നിന്ന് കൊഴിഞ്ഞുപോകുന്ന കുട്ടികളെ കണ്ടെത്തി തുടര്‍ വിദ്യാഭ്യാസമൊരുക്കുന്നതിനും വൈദഗ്ധ്യമില്ലാത്ത തൊഴിലുകളിലേര്‍പ്പെട്ടിരിക്കുന്ന 14 വയസിന് മുകളിലുള്ള കുട്ടികളെ കണ്ടെത്തി തൊഴില്‍ നൈപുണ്യ പരിശീലനം നല്‍കുന്ന കര്‍മ പദ്ധതി വിദ്യാഭ്യാസ വകുപ്പുമായി ചേര്‍ന്ന് ആവിഷ്‌ക്കരിക്കുന്നതാണെന്നും മന്ത്രി വ്യക്തമാക്കി.