കോഴിക്കോട്: ഇരുമ്പു തൂണ്‍ കാറ്റില്‍ പറന്ന് വീണ് സ്‌കൂള്‍ കെട്ടിടം തകര്‍ന്നു.
ചാലപ്പുറം ഗവ. ഗണപത് ബോയ്‌സ് ഹൈസ്‌കൂളിലെ യു.പി വിഭാഗത്തിലെ മൂന്ന് ക്ലാസ്മുറികള്‍ പ്രവര്‍ത്തിക്കുന്ന കെട്ടിടമാണ് തകര്‍ന്നത്.
സമീപത്തെ വുഡീസ് ഹോട്ടലിന്റെ മുകള്‍ നിലയിലെ നിര്‍മാണത്തിന്റെ മേല്‍ക്കൂരയെ താങ്ങി നിര്‍ത്തിയ ഭാരമുള്ള രണ്ട് ഇരുമ്പ് തൂണുകളാണ് ഓടിട്ട സ്‌കൂള്‍ കെട്ടിടത്തിന് മുകളില്‍ പതിച്ചത്. വ്യാഴാഴ്ച രാവിലെ പത്ത് മണിയോടെ നഗരത്തില്‍ ആഞ്ഞുവീശിയ കാറ്റിലാണ് കെട്ടിടത്തിന് മുകളിലേക്ക് തൂണ്‍ പറന്ന് വീണത്.
രണ്ട് കെട്ടിടങ്ങള്‍ക്ക് അപ്പുറത്ത് നിന്ന് വലിയ ഇരുമ്പ് തൂണ്‍ പറന്നെത്തുകയായിരുന്നു.
ക്ലാസ് മുറികളിലെ ബെഞ്ചും മേശയും തകര്‍ന്നിട്ടുണ്ട്. സമീപത്ത് നിര്‍ത്തിയിട്ട കാറും തകര്‍ന്നു. മഴ കാരണം കലക്ടര്‍ അവധി പ്രഖ്യാപിച്ചതിനാല്‍ വന്‍ദുരന്തം ഒഴിവായി.