കോട്ടയം: രണ്ടുദിവസമായി പെയ്യുന്ന ശക്തമായ മഴയിലും കാറ്റിലും ഉരുള്‍പൊട്ടലിലും ജില്ലയുടെ വിവിധ പ്രദേശങ്ങളില്‍ നാശനഷ്ടം. ജില്ലയില്‍ 120 വീടുകള്‍ ഭാഗികമായും ഏഴുവീടുകള്‍ പൂര്‍ണമായും തകര്‍ന്നു. മീനച്ചിലാറില്‍ ഒന്നും കോട്ടയത്ത് ആറും വീടുകളാണ് പൂര്‍ണമായി തകര്‍ന്നത്. കിഴക്കന്‍ പ്രദേശങ്ങളില്‍ വ്യാപകമായ മണ്ണിടിച്ചിലുണ്ടായി. തീക്കോയി വില്ലേജില്‍ കാരികാട് ടോപ്പില്‍നിന്ന് 150 മീറ്റര്‍ അകലെയാണ് ഉരുള്‍പൊട്ടലുണ്ടായത്. ആള്‍താമസമില്ലാത്ത മേഖലയാണെങ്കിലും നിരവധി കൃഷിസ്ഥലങ്ങള്‍ ഒലിച്ച് പോയി. മീനച്ചിലാര്‍ കരകവിഞ്ഞ് പാലാ- ഈരാറ്റുപേട്ട റോഡില്‍ വെള്ളം കയറി. എരുമേലി, എയ്ഞ്ചല്‍വാലി പ്രദേശങ്ങള്‍ ഒറ്റപ്പെട്ടു.
നദികളിലെ ജലനിരപ്പ് ഉയര്‍ന്നതോടെ ജില്ലയിലെ താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയിലാണ്. പാറമ്പുഴ, പെരിങ്ങള്ളൂര്‍ ഗവ.എല്‍.പി സ്‌കൂളിനു മുന്നിലേക്ക് വലിയ മരം കടപുഴകി വീണു.