ഗൂഡല്ലൂര്‍: മുതുമല കടുവാ സങ്കേതത്തിലെ തെപ്പക്കാടിന് സമീപം വിനോദ സഞ്ചാരികളുടെ കാറിടിച്ച് കടമാന്‍ ചത്തു. തെപ്പക്കാടിനും കക്കനഹള്ളക്കും ഇടയിലാണ് അപകടം നടന്നത്.
ഏഴു വയസുള്ള കടമാനാണ് ചത്തത്. ആന്ധ്രാപ്രദേശിലെ അനന്തപ്പൂര് സ്വദേശിയായ ജയറാം റെഡ്ഡിയും കുടുംബവും സഞ്ചരിച്ചിരുന്ന കാറാണ് അപകടത്തില്‍ പെട്ടത്. ഊട്ടി സന്ദര്‍ശിച്ച് മടങ്ങുകയായിരുന്ന ഇവരുടെ കാറിന് മുന്നിലൂടെ വനത്തില്‍ നിന്നെത്തിയ കടമാന്‍ കുറുകെ ചാടുകയായിരുന്നു. ഇതോടെ നിയന്ത്രണം വിട്ട കാര്‍ റോഡരികിലെ കുഴിയില്‍ വീണു.
വിവരമറിഞ്ഞ് കാര്‍ക്കുടി ഫോറസ്റ്റ് റെയ്ഞ്ചര്‍ കാന്തനും വനപാലക സംഘവും സ്ഥലത്തെത്തി പരിശോധന നടത്തി. സംഭവത്തില്‍ ജയറാം റെഡിക്ക് വനം വകുപ്പ് 15000 പിഴ ചുമത്തി. പിഴ അടച്ച ശേഷം ഇവരെ വിട്ടയച്ചു