കാബൂള്‍: അഫ്ഗാനില്‍ തെരഞ്ഞെടുപ്പ് റാലിക്കിടെയുണ്ടായ സ്‌ഫോടനത്തില്‍ കുറഞ്ഞതു 14പേര്‍ കൊല്ലപ്പെട്ടു. 32 പേര്‍ക്കു പരുക്കേറ്റു. അഫ്ഗാനിലെ തഖാറില്‍ ഇന്നലെ വൈകിട്ടായിരുന്നു സംഭവം.
പാര്‍ലമെന്ററി തെരഞ്ഞെടുപ്പില്‍ മത്സരിക്കുന്ന നാസിഫ യൂസുഫ് ബെക്കിയുടെ തെരഞ്ഞെടുപ്പ് റാലിക്കിടെയായിരുന്നു സ്‌ഫോടനം. റോഡരികില്‍ മോട്ടോര്‍ സൈക്കിളില്‍ സൂക്ഷിച്ച ബോംബാണ് പൊട്ടിത്തെറിച്ചതെന്നു പൊലിസിനെ ഉദ്ധരിച്ച് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. സ്‌ഫോടന സമയത്ത് സ്ഥാനാര്‍ഥി സ്ഥലത്തെത്തിയിരുന്നില്ല. അഫ്ഗാനില്‍ തെരഞ്ഞെടുപ്പ് കാംപയിന്‍ ആരംഭിച്ചതു മുതല്‍ ഇതുവരെ മൂന്ന് ആക്രമണങ്ങളിലായി 30 പേരാണ് കൊല്ലപ്പെട്ടത്.
സംഭവത്തിന്റെ ഉത്തരവാദിത്തം ആരും ഏറ്റെടുത്തിട്ടില്ലെങ്കിലും താലിബാനെയാണ് അധികൃതര്‍ സംശയിക്കുന്നത്. ഈ മാസം 20നാണ് അഫ്ഗാനില്‍ പാര്‍ലമെന്ററി തെരഞ്ഞെടുപ്പ് നടക്കുന്നത്. 249 അംഗ പാര്‍ലമെന്റിലേക്ക് 417 വനിതകളടക്കം 2,565 സ്ഥാനാര്‍ഥികളാണ് മത്സരിക്കുന്നത്.