നിലമ്പൂര്‍: ചാലിയാര്‍ പഞ്ചായത്തിലെ വെണ്ണേക്കോട് ആദിവാസി കോളനിയില്‍ തങ്ങള്‍ക്ക് ജന്മാവകാശമായി കിട്ടിയ ഭൂമിയില്‍ അവകാശ വാദമുന്നയിക്കുന്ന വനംവകുപ്പിന്റെ നിലപാടില്‍ പ്രതിഷേധവുമായി കോളനി നിവാസികള്‍. വനംവകുപ്പിനെതിരെ പ്രതിഷേധവുമായി എത്തിയ ആദിവാസികള്‍ ചാലിയാര്‍ പഞ്ചായത്തിലെത്തിയ സംസ്ഥാന പട്ടിക വര്‍ഗ ഡയറക്ടര്‍ പി. പുകഴേന്തിക്ക് നിവേദനം നല്‍കി. രേഖകള്‍ സഹിതമാണ് ഇവര്‍ പരാതി നല്‍കിയത്.
1968ല്‍ ജന്മാവകാശമായി ലഭിക്കുകയും 1980ല്‍ പട്ടയം ലഭിക്കുകയും 1996ല്‍ ജോയിന്റ് സര്‍വേയും 97ല്‍ റീസര്‍വേയും നടത്തി റവന്യൂ വകുപ്പ് വനാതിര്‍ത്തി നിര്‍ണയിച്ച് തങ്ങള്‍ക്ക് നല്‍കിയ ഭൂമിയിലാണ് വനംവകുപ്പിന്റെ പുതിയ അവകാശവാദമെന്ന് ആദിവാസികള്‍ പറഞ്ഞു.
കെ.ഇ ഇസ്മാഈല്‍ റവന്യൂ വകുപ്പ് മന്ത്രിയായിരുന്ന സമയത്താണ് നടപടികള്‍ പൂര്‍ത്തീകരിച്ച് ഭൂമി തങ്ങള്‍ക്ക് നല്‍കിയത്. 2016 വരെ നികുതിയടച്ചിരുന്ന പുള്ളിപ്പാടം വില്ലേജില്‍ വനംവകുപ്പിന്റെ നിര്‍ദേശത്തെ തുടര്‍ന്ന് നികുതി സ്വീകരിക്കാത്ത അവസ്ഥായാണുള്ളത്. വെണ്ണേക്കോട് കോളനി നിവാസികളുടെ ഭൂമി പ്രശ്‌നം അടിയന്തിരമായി ചര്‍ച്ച ചെയ്യുന്നതിന് ജില്ലാ കലക്ടര്‍, സ്ഥലം എം.എല്‍.എ, നിലമ്പൂര്‍ നോര്‍ത്ത് ഡി.എഫ്.ഒ എന്നിവരുടെ സാന്നിധ്യത്തില്‍ യോഗം ചേര്‍ന്ന് ഉടനടി പരിഹാരം കാണുമെന്ന് ഡയറക്ടര്‍ ഇവര്‍ക്ക് ഉറപ്പ് നല്‍കി. 24 കുടുംബങ്ങള്‍ക്ക് 2 ഏക്കര്‍ വീതം വനാവകാശ രേഖ നല്‍കാമെന്നാണ് വനംവകുപ്പിന്റെ നിലപാട്. എന്നാല്‍ തങ്ങള്‍ക്ക് അവകാശപ്പെട്ട 177 ഏക്കര്‍ സ്ഥലത്ത് 63 വീടുകളിലായി 90 കുടുംബങ്ങള്‍ താമസിക്കുന്നുണ്ട്. അതിനാല്‍ മുഴുവന്‍ ഭൂമിയും ലഭിക്കണമെന്നും നികുതി സ്വീകരിക്കണമെന്നുമാണ് ആദിവാസികളുടെ ആവശ്യം.