കോഴിക്കോട്: ശരീഅത്ത് വിരുദ്ധ നീക്കങ്ങളുണ്ടായപ്പോള്‍ സമുദായ നേതൃത്വത്തിന്റെ ശക്തിക്കു മുന്നില്‍ പാര്‍ലമെന്റില്‍ നിയമം കൊണ്ടുവരാന്‍ പ്രധാനമന്ത്രി തന്നെ മുന്നോട്ടു വന്നതാണ് മുന്‍കാല ചരിത്രമെന്നും അനീതിയുടെ നിയമങ്ങള്‍ നരേന്ദ്ര മോദിക്കു തിരുത്തേണ്ടി വരുമെന്നും എസ്.വൈ.എസ് സംസ്ഥാന ഉപാധ്യക്ഷന്‍ പാണക്കാട് സയ്യിദ് സ്വാദിഖലി ശിഹാബ് തങ്ങള്‍. ശരീഅത്ത് സമ്മേളനത്തില്‍ അനുഗ്രഹ പ്രഭാഷണം നിര്‍വഹിച്ച് സംസാരിക്കുകയായിരുന്നു അദ്ദേഹം.
ആചാരങ്ങളും സംസ്‌കാരങ്ങളും സംബന്ധിച്ച ഇടപെടലുകളില്‍ സംയമനം വേണമെന്നാണ് ഭരണഘടന അനുശാസിക്കുന്നത്. അത്തരം സംയമനം നഷ്ടപ്പെടുന്നുണ്ടോയെന്ന് സംശയിക്കേണ്ടിയിരിക്കുന്നു. രാജ്യത്തിന്റെ സാംസ്‌കാരിക പരിശുദ്ധി സംരക്ഷിക്കാനാണ് നിയമങ്ങള്‍. അത് സാംസ്‌കാരിക അശുദ്ധിയിലേക്ക് വഴിതെളിച്ചുകൂടാ.
ഏകപക്ഷീയമായി ഏക സിവില്‍ കോഡിലേക്കുള്ള നീക്കമാണ് നടക്കുന്നത്. ഇതിനെ നിയമപരമായി നേരിടണം. ന്യൂനപക്ഷ സമുദായങ്ങളുടെ അവകാശ സംരക്ഷണത്തിന് ഐക്യത്തോടെ മുന്നോട്ടു പോവണം.
അവകാശ സംരക്ഷണത്തിലേക്കുള്ള ചൂണ്ടുപലകയാണ് മുതലക്കുളത്തെ രണ്ടാം ശരീഅത്ത് സമ്മേളനമെന്നും തങ്ങള്‍ പറഞ്ഞു.