കാഠ്മണ്ഡു: നേപ്പാളില്‍ പുതിയ പ്രധാനമന്ത്രിയെ ഇന്ന് തെരഞ്ഞെടുക്കും. പുഷ്പ കമാല്‍ ദഹല്‍ പ്രചണ്ഡയുടെ രാജിയെ തുടര്‍ന്നാണ് പുതിയ പ്രധാനമന്ത്രിയെ തെരഞ്ഞെടുക്കുന്നത്.
ലെജിസ്ലേച്വര്‍ പാര്‍ലമെന്റ് സെക്രട്ടേറിയറ്റ് ആണ് ഇക്കാര്യം അറിയിച്ചത്. പ്രധാനമന്ത്രി സ്ഥാനാര്‍ഥികളുടെ പട്ടിക ഇന്നലെ വൈകിട്ട് പ്രസിദ്ധീകരിച്ചിരുന്നു. ഇന്ന് രാവിലെയാണ് പ്രധാനമന്ത്രിയുടെ തെരഞ്ഞെടുപ്പ് തുടങ്ങുക.
നേപ്പാളി കോണ്‍ഗ്രസ് പ്രസിഡന്റ് ഷേര്‍ ബഹാദൂര്‍ ദോബയായിരിക്കും പുതിയ പ്രധാനമന്ത്രി. സി.പി.എന്‍ മാവോയിസ്റ്റ് പാര്‍ട്ടിയും നേപ്പാളി കോണ്‍ഗ്രസും തമ്മിലുള്ള ധാരണയെ തുടര്‍ന്നാണ് പ്രചണ്ഡ രാജിവച്ചത്.
പ്രസിഡന്റ് ബിദ്യാ ദേവി ഭണ്ഡാരി പ്രമുഖ രാഷ്ട്രീയപാര്‍ട്ടികളെ സര്‍ക്കാര്‍ രൂപീകരിക്കാന്‍ ക്ഷണിച്ചിരുന്നു.
പുതിയ പ്രധാനമന്ത്രിക്ക് ഭൂരിപക്ഷം തെളിയിക്കേണ്ടിവരും. ഒരാഴ്ചയായി നേപ്പാളിന് പ്രധാനമന്ത്രി ഇല്ല.