സ്വന്തം ലേഖകന്‍
ആലപ്പുഴ: കേരളം വീണ്ടുമൊരു പ്രളയ ദുരന്തത്തെ നേരിടുന്ന പശ്ചാത്തലത്തില്‍ നെഹ്‌റു ട്രോഫി ജലോത്സവം മാറ്റിവച്ചു. ഇതോടൊപ്പം നടത്താന്‍ നിശ്ചയിച്ചിരുന്ന പ്രഥമ ചാംപ്യന്‍സ് ബോട്ട് ലീഗ് മത്സരവും മാറ്റി. തുടര്‍ച്ചയായ രണ്ടാം വര്‍ഷമാണ് നെഹ്‌റു ട്രോഫി ജലോത്സവം മാറ്റിവയ്ക്കുന്നത്.
കേരളം വീണ്ടുമൊരു കാലവര്‍ഷക്കെടുതിയെ നേരിടുന്ന സാഹചര്യത്തിലാണ് ജലോത്സവം മാറ്റിയത്. ഓഗസ്റ്റിലെ രണ്ടാം ശനിയാഴ്ചയായ ഇന്നാണ് നെഹ്‌റു ട്രോഫി ജലോത്സവം നടക്കേണ്ടിയിരുന്നത്. പ്രളയ സാഹചര്യം വിലയിരുത്തിയ ശേഷമേ ജലോത്സവം എന്നു നടത്തുമെന്നത് സംബന്ധിച്ച തീരുമാനം ഉണ്ടാകു. നെഹ്‌റു ട്രോഫി വള്ളം കളിയും ചാംപ്യന്‍സ് ബോട്ട് ലീഗും നടത്താനുള്ള എല്ലാ ഒരുക്കങ്ങളും സംഘാടകര്‍ പൂര്‍ത്തിയാക്കിയിരുന്നു.
ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കറായിരുന്നു മുഖ്യാതിഥി. നെഹ്‌റു ട്രോഫി മാറ്റിയത് സംബന്ധിച്ച സാഹചര്യം സച്ചിനെ അറിയിച്ചിട്ടുണ്ട്. കഴിഞ്ഞ വര്‍ഷവും സച്ചിനെയായിരുന്നു മുഖ്യാതിഥിയായി ക്ഷണിച്ചിരുന്നത്. കഴിഞ്ഞ വര്‍ഷം കുട്ടനാട്ടില്‍ ഉണ്ടായ പ്രളയത്തെ തുടര്‍ന്ന് മാറ്റിവച്ച നെഹ്‌റു ട്രോഫി വള്ളം കളി നവംമ്പര്‍ 10 ന് ആണ് നടത്തിയത്.
ഇതിന് മുന്‍പ് 2002 ലെ കുമരകം ബോട്ട് ദുരന്തെ തുടര്‍ന്നാണ് നെഹ്‌റു ട്രോഫി ജലോത്സവം മാറ്റിവച്ചത്. പിന്നീട് 2002 സെപ്റ്റംബര്‍ 13 ന് ജലോത്സവം നടത്തി. ജലോത്സവം മാറ്റിയതോടെ ക്ലബുകള്‍ക്കും സംഘാടകര്‍ക്കും വലിയ നഷ്ടമാണ് ഉണ്ടായിരിക്കുന്നത്.