മലപ്പുറം: പ്ലസ്‌വണ്‍ പ്രവേശനത്തിനുള്ള ഓണ്‍ലൈന്‍ അപേക്ഷകള്‍ ആറിന് വൈകീട്ട് അഞ്ചുവരെ സ്വീകരിക്കും. മെയ് 22ന് അപേക്ഷ സ്വീകരിക്കുന്നത് അവസാനിപ്പിക്കാന്‍ തീരുമാനിച്ചിരുന്നെങ്കിലും ഹൈക്കോടതി ഇടപെടലിനെ തുടര്‍ന്നാണ് തിയതി ദീര്‍ഘിപ്പിച്ചത്.
സി.ബി.എസ്.ഇ പത്താംക്ലാസ് വിദ്യാര്‍ഥികള്‍ക്കുകൂടി അപേക്ഷ സമര്‍പ്പിക്കാനുദ്ദേശിച്ചാണിത്. സി.ബി.എസ്.ഇ അപേക്ഷകരില്‍ ബോര്‍ഡ്തല പരീക്ഷയില്‍ യോഗ്യത നേടുന്നവരെ മാത്രമേ ഏകജാലക പ്രവേശനത്തിനുള്ള മുഖ്യ അലോട്ട്‌മെന്റുകളില്‍ പരിഗണിക്കുകയുള്ളൂ. ഓണ്‍ലൈനായി സമര്‍പ്പിച്ച അപേക്ഷകരുടെ പ്രിന്റൗട്ട് അനുബന്ധരേഖകള്‍ സഹിതം സ്‌കൂളില്‍ വെരിഫിക്കേഷനു സമര്‍പ്പിക്കുന്നതിനുള്ള അവസാന തിയതിയും ജൂണ്‍ ആറിന് വൈകീട്ട് അഞ്ചുമണിവരെയാണ്.
സ്‌പോര്‍ട്‌സ് ക്വാട്ടയില്‍ പ്രവേശനം നേടുന്നതിന്റെ ഒന്നാം ഘട്ടമായ സ്‌പോര്‍ട്‌സ് മികവ് രജിസ്‌ട്രേഷന്‍ ജില്ലാ സ്‌പോര്‍ട്‌സ് കൗണ്‍സിലുകളില്‍ നാളെ വൈകീട്ട് അഞ്ചുവരെ നടക്കും. രണ്ടാംഘട്ട സ്‌പോര്‍ട്‌സ് ഓണ്‍ലൈന്‍ അപേക്ഷ സമര്‍പ്പിക്കുന്നതിനുള്ള അവസാന തിയതി ആറിന് വൈകീട്ട് അഞ്ചുമണിക്ക് അവസാനിക്കും.
അതേസമയം എസ്.എസ്.എല്‍.സി പരീക്ഷയുടെ ഫലം പുനര്‍മൂല്യനിര്‍ണയത്തിലൂടെ മെച്ചപ്പെടുത്തിയ അപേക്ഷകര്‍ക്ക് ഇത് അപേക്ഷയില്‍ ഉള്‍പ്പെടുത്താന്‍ ഹയര്‍ സെക്കന്‍ഡറി വിഭാഗം അവസരം ഒരുക്കിയിട്ടുണ്ട്. അപേക്ഷ വെരിഫിക്കേഷനായി സമര്‍പ്പിച്ച സ്‌കൂള്‍ പ്രിന്‍സിപ്പലിന് തിരുത്തല്‍ അപേക്ഷ തെളിവുസഹിതം നല്‍കണം.