കുമ്പള: വിദ്യാര്‍ഥിനിയെ പീഡിപ്പിച്ച സംഭവത്തില്‍ ഒരു യുവാവ് കൂടി അറസ്റ്റില്‍. നാലുദിവസം മുമ്പ് സ്‌കൂളിലെ കലോത്സവ പരിപാടികള്‍ക്കിടയില്‍നിന്ന് ഓട്ടോറിക്ഷയില്‍ കൂട്ടിക്കൊണ്ടുപോയി പീഡിപ്പിക്കപ്പെട്ട പെണ്‍കുട്ടിയെ മാസങ്ങള്‍ക്കു മുമ്പ് പീഡിപ്പിച്ച കേസിലാണ് മറ്റൊരു യുവാവ് ഇന്നലെ അറസ്റ്റിലായത്. പെണ്‍കുട്ടിയുടെ പരാതിയില്‍ ജോഡ്ക്കട്ട കിദൂരിലെ ശശികുമാറിനെ(19) കുമ്പള സി.ഐ അറസ്റ്റു ചെയ്തു. മെയ് രണ്ടിനു ശശികുമാര്‍ തന്നെ പീഡിപ്പിച്ചുവെന്നാണ് പെണ്‍കുട്ടിയുടെ പരാതി. കലോത്സവത്തിനിടയില്‍ ഓട്ടോയില്‍ വിദ്യാര്‍ഥിനിയെ കൂട്ടിക്കൊണ്ടു പോയി ആളൊഴിഞ്ഞ വീട്ടില്‍ വച്ച് പീഡിപ്പിച്ച സംഭവത്തില്‍ ഓട്ടോഡ്രൈവറായ ബംബ്രാണ വയലിലെ കിരണ്‍ രാജ് ഷെട്ടിയെ പൊലിസ് കഴിഞ്ഞ ദിവസം അറസ്റ്റു ചെയ്തിരുന്നു. സംഭവ ദിവസം കുറെ സമയം പെണ്‍കുട്ടിയെ സ്‌കൂളില്‍ കാണാതെ വന്നതോടെയാണ് അധ്യാപികമാര്‍ ഉള്‍പ്പെടെ കുട്ടിയോട് കാര്യങ്ങള്‍ അന്വേഷിച്ചത്. ഇതേ തുടര്‍ന്ന് പീഡന വിവരം പുറത്തറിയുകയും സ്‌കൂള്‍ അധികൃതര്‍ ചൈല്‍ഡ് ലൈനില്‍ വിവരം അറിയിക്കുകയുമായിരുന്നു. തുടര്‍ന്നാണ് പൊലിസ് കേസെടുത്ത് കിരണ്‍ രാജിനെ അറസ്റ്റു ചെയ്തത്. ഇതിനു പിന്നാലെയാണ് ശശികുമാറിനെയും പെണ്‍കുട്ടിയെ പീഡിപ്പിച്ച പരാതിയില്‍ അറസ്റ്റു ചെയ്തത്.