മധ്യധരണ്യാഴിയുടെ ഹൃദയഭാഗത്ത് സ്ഥിതിചെയ്യുന്ന യൂറോപ്യന്‍ രാജ്യമാണ് ഇറ്റലി. തലസ്ഥാന നഗരമായ റോമിന് രണ്ടര സഹസ്രാബ്ദത്തിലധികം പഴക്കമുണ്ട്. പാശ്ചാത്യ സംസ്‌കാരം,വിശ്വാസം, രാഷ്ട്രീയം എന്നിവ രൂപപ്പെടുത്തുന്നതില്‍ നിര്‍ണായക പങ്കുവഹിച്ച റോം നഗരത്തിനുള്ളിലെ സ്വതന്ത്ര ക്രിസ്ത്യന്‍ രാജ്യമാണ് വത്തിക്കാന്‍. ആറു കോടിയിലധികം വരുന്ന ഇറ്റാലിയന്‍ ജനസംഖ്യയുടെ 83 ശതമാനവും ക്രിസ്ത്യാനികളാണ്.രണ്ടാമത്തെ മതവിഭാഗമായ മുസ്‌ലിംകള്‍ ജനസംഖ്യയുടെ മൂന്ന് ശതമാനം വരും.
ഒന്‍പതാം നൂറ്റാണ്ടിലാണ് ഇറ്റലിയിലേക്ക് ഇസ്‌ലാം കടന്നുവരുന്നത്. ഇറ്റാലിയന്‍ പ്രവിശ്യയായ സിസിലി അബ്ബാസിയ്യ ഖിലാഫത്തിന്റെ ഭാഗമായതോടെയായിരുന്നു ഇത്.12ാം നൂറ്റാണ്ടുവരെ നല്ലൊരു ശതമാനം മുസ്‌ലിംകള്‍ രാജ്യത്തുണ്ടായിരുന്നു. തുടര്‍നൂറ്റാണ്ടുകളിലെ രാഷ്ട്രീയ ഗതിമാറ്റങ്ങളുടെ ഫലമായി നിര്‍ബന്ധിത മതപരിവര്‍ത്തനത്തിനോ നാടുകടത്തലിനോ മുസ്‌ലിംകള്‍ വിധേയമാവുകയുണ്ടായി.
14 മുതല്‍ 20 വരെയുള്ള നൂറ്റാണ്ടുകളില്‍ ഇസ്‌ലാം രാജ്യത്തിനന്യമായിരുന്നു. കഴിഞ്ഞ നൂറ്റാണ്ടില്‍ സൊമാലിയയില്‍ നിന്നുള്ള കുടിയേറ്റക്കാരെത്തിയതോടെ ഇറ്റലിയിലെ മുസ്‌ലിം ചലനങ്ങള്‍ പുനര്‍ജനിച്ചു. നിലവില്‍, വിവിധ ആഫ്രിക്കന്‍ രാജ്യങ്ങളില്‍ നിന്നുള്ള കുടിയേറ്റക്കാരാണ് ഇറ്റാലിയന്‍ മുസ്‌ലിംകളുടെ സിംഹഭാഗവും.
 രണ്ടാമത്തെ വലിയ മതമാണെങ്കിലും ഇസ്‌ലാമിനെ അംഗീകൃത മതങ്ങളില്‍ ഇതുവരെ ഇറ്റലി ഉള്‍പ്പെടുത്തിയിട്ടില്ല. വിവിധ ക്രിസ്ത്യന്‍ ധാരകള്‍ക്കൊപ്പം ജൂത,ബുദ്ധ,ഹിന്ദു മതങ്ങള്‍ക്കെല്ലാം ഔദ്യോഗിക അംഗീകാരമുണ്ടായിട്ടും ഇസ്‌ലാമിനെ ഇന്നും പുറത്തുനിര്‍ത്തിയിരിക്കുന്നത് വിവാദ വിഷയമാണ്. അംഗീകൃത മതമല്ലാത്തതിനാല്‍ ഇസ്‌ലാമിക സ്ഥാപനങ്ങള്‍ക്കും ആരാധനാലയങ്ങള്‍ക്കും അനുമതി നേടല്‍ ദുഷ്‌കരമാണ്.
മുസ്‌ലിം സാംസ്‌കാരിക കേന്ദ്രങ്ങള്‍ എന്ന രീതിയിലാണ് രാജ്യത്തെ മിക്ക മസ്ജിദുകളും പ്രവര്‍ത്തിക്കുന്നത്. റമദാനില്‍ പ്രത്യേകം സജ്ജമാക്കുന്ന'രഹസ്യ മസ്ജിദുകളും'സാര്‍വത്രികമാണ്. ഇസ്‌ലാമിനെ അംഗീകരിക്കുന്നതിനുള്ള ചര്‍ച്ചകള്‍ ഭരണകൂടത്തിനും മുസ്‌ലിം സംഘടനകള്‍ക്കുമിടയില്‍ വര്‍ഷങ്ങളായി നടക്കുന്നുണ്ടെങ്കിലും അന്തിമ വിജ്ഞാപനം ഇനിയുമുണ്ടായിട്ടില്ല.
ദൈര്‍ഘ്യമേറിയ പകലുകളാണ് ഇറ്റാലിയന്‍ റമദാന്റെ പ്രത്യേകത.17 മണിക്കൂറിലധികമുണ്ട് ഈ വര്‍ഷത്തെ നോമ്പിന്. പതിനെട്ടര മണിക്കൂര്‍ വരെ ദൈര്‍ഘ്യമുണ്ടായിരുന്ന മുന്‍വര്‍ഷങ്ങളിലെ റമദാനില്‍, മോശം ആരോഗ്യസ്ഥിതിയെ തുടര്‍ന്ന് അഭയാര്‍ഥികളോട് വ്രതമുപേക്ഷിക്കാന്‍ രാജ്യത്തെ മതനേതൃത്വം ആഹ്വാനം ചെയ്തിരുന്നു. എരിത്രിയ, സൊമാലിയ,സിറിയ തുടങ്ങിയ ദുരന്തബാധിത രാജ്യങ്ങളില്‍ നിന്ന് വന്‍തോതിലുള്ള അഭയാര്‍ഥി പ്രവാഹമാണ് ഇറ്റലിയിലേക്കുണ്ടായിരുന്നത്.
പരമ്പരാഗത ഇറ്റാലിയന്‍ വിഭവങ്ങള്‍ക്കാണ് ഇഫ്താര്‍ വിരുന്നുകളില്‍ കൂടുതല്‍ പ്രിയം. ആപ്പിള്‍, നേന്ത്രപ്പഴം, കിവി,ആപ്രിക്കോട്ട്, പ്ലംസ്, റോസ്‌ബെറി തുടങ്ങിയ പഴങ്ങള്‍ ചേര്‍ത്തുണ്ടാക്കുന്ന പ്രത്യേകതരം ഇറ്റാലിയന്‍ ഫ്രൂട്‌സലാഡ് നോമ്പുതുറയുടെ നിര്‍ബന്ധ ഭാഗമാണ്. വിവിധതരം അറബ് വിഭവങ്ങളും ഇഫ്താര്‍ വിരുന്നുകളെ സമ്പന്നമാക്കുന്നു.
യൂറോപ്പിലെ തന്നെ ഏറ്റവും വലിയ പള്ളിയായ റോം മോസ്‌ക് റമദാന്‍ വരുന്നതോടെ കൂടുതല്‍ സജീവമാകുന്നു. മസ്ജിദിലെ ഇഫ്താര്‍, തറാവീഹ് സംഗമങ്ങളില്‍ ആയിരങ്ങളാണ് പങ്കെടുക്കാറ്. സഹോദര സമുദായങ്ങള്‍ക്കും പങ്കെടുക്കാവുന്ന ഇഫ്താറിലേക്ക് റോം മേയറെ ക്ഷണിക്കുന്ന പതിവുമുണ്ട്.