ചെറുവത്തൂര്‍: വര്‍ഷങ്ങള്‍ നീണ്ട കാത്തിരിപ്പിനും പ്രക്ഷോഭങ്ങള്‍ക്കും ഒടുവില്‍ തിമിരിയിലെ കൈവശ ഭൂമിക്കാരായ 26 പേര്‍ക്ക് കൂടി പട്ടയം ലഭിച്ചു. മുപ്പതു വര്‍ഷത്തോളമായി ഇവിടെ താമസിച്ചുവരുന്നുണ്ടെങ്കിലും പട്ടയം ലഭിക്കാത്തതിനാല്‍ സര്‍ക്കാര്‍ ആനുകൂല്യങ്ങളൊന്നും ഇവര്‍ക്ക് ലഭിച്ചിരുന്നില്ല. 54 കുടുംബങ്ങള്‍ക്ക് കൂടി ഇനി ഈ പ്രദേശത്ത് പട്ടയം ലഭിക്കാനുണ്ട്. ഭൂപരിഷ്‌കരണ നിയമപ്രകാരം 1976 -79 കാലത്ത് അറുനൂറിലധികം കര്‍ഷക തൊഴിലാളികള്‍ക്ക് കയ്യൂര്‍-ചീമേനി പഞ്ചായത്തില്‍ ഒരേക്കര്‍ വീതം ഭൂമി പതിച്ചുനല്‍കിയിരുന്നു.
എന്നാല്‍ ചില കുടുംബങ്ങള്‍ നിശ്ചിതകാലാവധിക്കുമുമ്പ് ഭൂമി പൂര്‍ണമായോ ഭാഗികമായോ കൈമാറ്റം ചെയ്തു. എന്നാല്‍ നിശ്ചിതകാലാവധിക്കു മുമ്പുള്ള ഭൂമി കൈമാറ്റം സാധൂകരിക്കാന്‍ കഴിയില്ലെന്ന നിയമവ്യവസ്ഥകളെ തുടര്‍ന്ന് ഭൂമി വാങ്ങിയവരില്‍നിന്നു നികുതി സ്വീകരിച്ചില്ല. ഇതോടെ നിരവധി കുടുംബങ്ങള്‍ പ്രതിസന്ധിയിലായി. പ്രതിഷേധ സമരങ്ങളുടെ ഭാഗമായി 1999ലെ ഉത്തരവു പ്രകാരം 50പേര്‍ക്കും 2000ല്‍ 33പേര്‍ക്കും പട്ടയം നല്‍കി. എന്നാല്‍ മുഴുവനാളുകള്‍ക്കും പട്ടയം നല്‍കണമെന്ന ആവശ്യവുമായി പ്രക്ഷോഭങ്ങള്‍ നടന്നുവരികയായിരുന്നു. ശേഷിക്കുന്ന 80 കുടുംബങ്ങളില്‍ 26 പേര്‍ക്കാണ് ഇപ്പോള്‍ പട്ടയം ലഭിച്ചത്.