കോഴിക്കോട്: നാലുദിവസമായി തിമിര്‍ത്ത് പെയ്യുന്ന മഴയ്ക്ക് ഇന്നു ശമനമുണ്ടാവുമെന്ന് റിപ്പോര്‍ട്ട്. ഇന്നലെ രാത്രി ഇടയ്ക്കിടെ പെയ്ത മഴക്കു പിന്നാലെ ഇന്നു രാവിലെ തെളിഞ്ഞ ആകാശമാണ് മിക്ക മേഖലയിലും പ്രത്യക്ഷപ്പെട്ടത്. എങ്കിലും ചിലയിടങ്ങളില്‍ മഴയുണ്ട്. ഇന്നലെ വൈകിട്ട് മുതല്‍തന്നെ വടക്കന്‍ കേരളത്തില്‍ ഉള്‍പ്പെടെ പലയിടത്തും മഴയുടെ ശക്തികുറഞ്ഞിരുന്നു. കനത്തമഴയില്‍ വെളളത്തില്‍ മുങ്ങിയിരുന്ന നിലമ്പൂര്‍, എടവണ്ണ മേഖലയില്‍ രാത്രിയോടെ വെള്ളമിറങ്ങി തുടങ്ങി.

ഉരുള്‍പൊട്ടലുണ്ടായ കവളപ്പാറയിലും പുത്തുമലയിലും ഇന്ന് വീണ്ടും മണ്ണിനടിയില്‍പെട്ടവര്‍ക്കായുള്ള തിരച്ചില്‍ പുനരാരംഭിക്കും. കവളപ്പാറയില്‍ തിരച്ചിലിനായി സൈന്യമെത്തും.

വയനാട്, കണ്ണൂര്‍, കാസര്‍കോട് ജില്ലകളില്‍ ഇന്നും റെഡ് അലര്‍ട്ട് തുടരും. എറണാകുളം, ഇടുക്കി, തൃശ്ശൂര്‍, പാലക്കാട്, മലപ്പുറം, കോഴിക്കോട് ജില്ലകളില്‍ ഓറഞ്ച് അലര്‍ട്ടുണ്ട്.

മേപ്പാടി പുത്തുമലയില്‍ ഒമ്പതുപേരെ കണ്ടെടുക്കാനുണ്ടെന്നാണ് അധികൃതര്‍ നല്‍കുന്ന വിവരം. ശനിയാഴ്ച രാത്രിമുതല്‍ വയനാട്ടില്‍ തോരാമഴയില്ല എന്നതും രക്ഷാപ്രവര്‍ത്തകര്‍ക്ക് ആശ്വാസംനല്‍കുന്നു.

ഇന്നു ഉച്ചയോടെ മഴയുടെ അളവ് കുറയുമെന്ന് കാലാവസ്ഥ പ്രവചനത്തിലൂടെ ശ്രദ്ധനേടിയ തമിഴ്‌നാട് വെതര്‍മാനും അറിയിച്ചു. കേരളം, കര്‍ണാടക, തമിഴ്‌നാട് നീലഗിരി മേഖലകളില്‍ ഇനി ശക്തമായ മഴയുണ്ടാകില്ലെന്നും സാധാരണ മണ്‍സൂണ്‍ മാത്രമേ അനുഭവപ്പെടുകയുള്ളുവെന്നും അദ്ദേഹം പറയുന്നു.

മരിച്ചവരുടെ എണ്ണം 63 ആയി ഉയര്‍ന്നിട്ടുണ്ട്. വെള്ളം കയറിയതിനെ തുടര്‍ന്ന് അടച്ചിട്ട നെടുമ്പാശേരി വിമാനത്താവളം ഇന്ന് തുറക്കും. ഷൊര്‍ണൂരിനും കോഴിക്കോടിനുമിടയില്‍ ട്രെയിന്‍ സര്‍വീസ് പുനരാരംഭിക്കുന്ന കാര്യത്തിലും ഇന്ന് തീരുമാനമുണ്ടാകും.

#heavy_rain_in_kerala, #kerala_flood_2019 #malabar_flood